Kiatsikkiartuinnavippoq Canadallu issittortaani siku milliartuinnavilluni

Tamaani aasaq 30-t angullugit kiattarpoq, tamannalu issittup imaani sikup aakkiartorneranut pisooqataalluni. Sikup sinaa tiffaraluttuinnarpoq, Tuttujaartuumilu najugallit ilaata oqarneratut, ukiualunnguit matuma siornagut sikup sinaavanut 60 kilometerit missiliuinnaraluarpai, maannali sikup sinaava 120 kilometerit sinnerlugit ungasissuseqalersimalluni. USA-mi aput sermerlu pillugit paasissutsiisarfiup The US National Snow and Ice Center qaammataasakkut uuttortaanerit iluaqutigalugit missiliuussivoq sermeq julimi ullut tamaasa ima aattartigisoq allaat sermeq Belgiap angissusiata pingasoriaataata missaaniittoq aattarluni. Ilisimatuut Amerikamiut Canadamiullu arlallit siornali siunnersuuteqaraluarput Qalasersuup eqqaani siku UNESCO-p ataani nunarsuarmi eriagisassatut nalunaarutigineqassasoq, taamaalillunilu nunat issittut nunallu allat sikoq allanngutsaaliorniarlugu misilinniassammassuk. Sap. akunnerani uani New Zealandimi eqqumiitsuliortut arlallit iluliaasaliaq 7 meterisut takitigisoq sanasimavaat Wellingtonillu umiarsualiviani kisaqqatillugu, inuit silap allanngoriartorneranik eqqaasinniarlugit taamatullu pisoqariartulerneranik sikuerunnissaanillu annilaangasaarniarlugit, tamanna kingusinaareersinnagu.

ip Canadami Montrealimit ilanngutassiaa Holger P. Petersenimit kalaallisuunngortinneqarpoq.