Ilisimatuut oqaatiginiartagaat, tassalu silaannaap allanngoriartornera siunissami mittarfinnut kinguneqapilussinnaavoq, kissakkiartornerani nuna qeriuaannartoq mittarfiillu inissisimaffigisaat aakkiartulersinnaammat.
Nuna qeriuaannartoq aakkiartulissappat, mittarfiit ilaatigut Qaanaamiittoq Qaarsuniittorlu manikkunnaarlutik ajornartorsiortitsilersinnaapput, ASIAQ-mit Jens Nykjær Larsen oqarpoq.
Assersuutigalugu Maniitsumit avannamut sineriammi silaannaap allanngoriartornera ajornartorsiortitsilereersimasoq takuneqarsinnaavoq. Sisimiuni illoqarfiup qeqqani aqquserngit manikkunnaartalernerat nunap qeriuaannartup aakkiartulerneranik pissuteqartoq Jens Nykjær Larsen erseqqissaavoq.
- Qujanartumilli arriitsumik aakkiartorpoq, taamaattumillu misissuinissamut iliuuseqarnissamullu piffissaqarpugut, Jens Nykjær Larsen oqarpoq.
Kitaani silaannaap kissakkiartulernerani misissuinerit takutippaat, nuna qeriuaannartoq ukiut 50-it 150-illu ingerlaneranni aassasoq.
Ineqartut suliassiissutaat Østre Landsretip aalajangiiffigissavaa
Inissiaatileqatigiiffiup INI-p aamma Nuummi najugaqartut immikkoortortaata Atertap suliamik ingerlatitseqqiinerat Danmarkimi Østre Landsretip ullumi aalajangersaaffigalugu suliarisussanngorpaa. Atertarmiut isumaqarput, INI-p najugaqartut ukiuni arlalinngortuni amerlanaarlugit aningaasarsiutigisarsimagai.
Nunatta Eqqartuussivia siorna inerniliivoq, Atertarmiut unnerluussutaat eqqortortaqartoq. INI siorna juullilersoq nassuerpoq, Atertarmiunut piffissami 1995-imit 1999-imut akilioraasitsivallaartarsimalluni, inissianullu 114-inut tunngatillugu aningaasat katillugit 3,8 million koruunit utertissallugit.
Najugaqartulli aamma INI-mut allaffissornikkut akiliivallaartarnertik naammagittaalliutigisimavaat, suliassiissullu tamanna Østre Landsretimi nunatta nalunaaqutaa malillugu qulinut suliarineqassaaq aalajangersaavigineqassallunilu.