Kiassarneq akikinnerulissaaq
- Kiassarnermut akiliut uuliap akianut naapertuuttussaavoq, uuliallu akia siorna apparpoq, tamannalu 2016-imi akitigut maunniutissaaq, Michael Pedersen KNR-imut oqarpoq.
Kiammik allamiit pilersorneqarnermi 1000 kilowatt tiimimut 30 koruuninik apparluni 820 koruuneqalerpoq.
Michael Pedersen naapertorlugu tamanna isumaqarpoq, angerlarsimaffiit innaallagissamik, imermik kiammillu naliginnaasumik atuisut, ukiumut 600 koruuninik aappaagumiit akiliinikinnerussasut.
Aamma atuaruk Ukiumi nutaami innaallagiaq akisunerulissaaq
Nammaqatigiinnerup akit appasitsippai
Akilli aalajangersorneqartarneranni innaallagissap, erngup kiassarnerullu akii immikkoortillugit isigineqarsinaanngillat.
- Sumiiffiit akikitsumik pilersuiffiusut sumiiffinnut akisuumik pilersuiffiusunut tapiissuteqartarput. Atuisut taamaalillutik nuna tamakkerlugu assigiikannersumik akiliisarlutik, Nukissiorfiit pisortaat nassuiaavoq.
Tassalu illoqarfinni anginerni imermik, kiammik innaallagissamillu pilersuimnermut aningaasartuutinit, atuisut tamakkunani najugallit qaffasinnerusumik akiliisarput, illoqarfinni minnerusumi nunaqarfinnilu aningaasartornerulluni pilersuinermi akit appasinneruniassammata.
Akit uninngatissimavaat
Kisianni naak pilersuinermi aningaasartuutit ukiuni kingullerni qulini qaffassimagaluartut, aningaasat naleerukkiartornerat taavalu naammassisaqarfiunerusumik ingerlatsineq pissutigalugit, atuisut akit qaffakkiartornerat malugivissimanngikkaat, Michael Pedersenip erseqqissarpaa.
- Tassalu Nukissiorfiit akit piffissami sivisuumi uninngatissinnaasimavaat. Ataatsimut isigalugu isertitat aningaasartuutillu oqimaaqatigiisinniarlugit, aningaasartuutivut nakkutigiuarpavut, Michael Pedersen oqarpoq.
Kisianni angerlarsimaffiit naliginnaasut kiassarnermik nammineq isumaginnittut, taamaallu innaallagissamik imermillu pilersorneqartut, 29 koruunit missaannik qaammammut akiliinerusalissapput.
