Kiassaatit qamittoortut ajornartorsiortitsipput

Narsami angerlarsimafippaaluit suliffeqarfiillu ilai kiassaatilullutik ullut 14–it kingulliit ingerlanerini ruujorilerisunut ikiortissarsiortariaqarsimapput, tamatumunnga pissutaasimavoq aasaanerani orsussap atorneqarsimanera.
Allattoq Mads Lynge
decembarip 27-at 2007 11:17

- Decembari aallartilaaginnartorli angerlarsimaffinnit suliffeqarfinniillu sianerfigitittuarpugut kiassaamminnik qamittoorsimallutik qiiasorujussuarnik aamma biilit aallarsinnaajunnaarsimasarput qulit tikiinnarlugit issileriaratta, taama oqarpoq Narsami ruujorilerisoq John Christensen.

Maniitsumi Polar Oil–ip qullersaqarfiata nassuiaatigaa, aasami orsussaq atorneqartartoq ukiukkut atorneqarsimagaangami nalinginnaagaluartoq 22–t 23-llu tikillugit issileraangat, taava uulia pisarnermisut kinersisartoq.

- Nalinginnaavoq decembari aallartikkaangat Arktisk Gas uuliamik taaguutilik, tassa ukiuunerani uuliap aasaanerani uuliamut taarsiullugu atorneqalertarnera, taama nassuiaavoq Tage Lindegård, Maniitsumi Polar Oil-meersoq.

Kisianni Narsami taama issitsigilernerata tassanngaannarnera Narsami uuliamik pilersuisunut pakasaasimasoq paasinarpoq.

Kaj Eliassen Narsami Tankeqarfimmi pisortaq oqarpoq decembarip aallartinnerani tassanngaannaq taama issitsigilernissaa naatsorsuutigisimanngikkitsik, tassami 15–it 18–illu akorni tikittarlugit issittalerami.

- Siornatigut sungiusimavarput decembarip tungaanut aasaanerani orsussaq atortarlutigu, kisianni tassa mannakkut ukiuunerani orsussaq atulerparput, taama ilisimatitsivoq Kaj Eliassen.