Kiannerulerpat uumasut nuussapput
Sikuiuitsup avannarliup sikuata aakkiartornerata issittumi nunalinnut kingunissai Islandimi silaannaap allanngoriartornera pillugu ataatsimeersuarnermi ullaaq saqqummiunneqarput. Qalasersuup sikuata annikilliariarsimanera ukiuni 50-ini kingullerni misissuinerit paasinarsisippaat.
Ilisimatuunit oqaatigineqarpoq ukiut 50-it ingerlaneranni sikuiuitsoq avannarleq 10 procentit angullugit annikilleriarsimasoq. Sikuiuitsup avannarliup anikkilliartornera tamaani uumasutut illikarnerannik kinguneqassassoq oqaatigineqarpoq aammali immakkut aqqut nutaaq pileriartussaaq. Siunissamilu immakkut aqqutitaassap siuiuitsuusimasup nalaaniittup nunanit suliffissuaqarfiusunit atorluarniarneqarnissaa ilimagineqarpoq.
Illuatungaani issittumi nunallit eqqarsaatigalugit uumasunillu illersuiniarluni suliniuteqartariaqalernissaq aamma naatsorsuutigisariaqartoq erseqqissaatigineqarpoq. 1977-imiilli Qalasersuaq umiarsuarujussuarnit nunanit tamalaaneersunit 52-init tikinneqarsimavoq. Umiarsuarsuit Canadap Ruslandillu akornat Berinngiup kangerluimarnga Imarpiullu avannaa aqqusaarlugit Qalasersuarmut aasaanerani annguttarsimapput.
Ilisimatuut ernummatigaat, sikuiuitsup nalaa imaannanngorpat ingasattumik atorluarniarneqalissasoq, angallannikkut aammali uuliasiorniarnikkut. Siuiuitsup avannarliup kangiatungaata piffissami matumani ukiunut ulluni 20-iniit 30-it tikillugit angallavigineqartarpoq. 2080-ip tungaanut ukiumut ulluni 150-ini angallavigineqarsinnaalernissaa naatsorsuutigineqarpoq.
Sikuiuitsoq avannarliup imartaa aqqutinngorpat kitaani nunanit Asiamut angalasarnerit 40 procentinik sipaarfiusinnaalissapput. Sikuiuitsup avannarliup uulisiorfiginiarneqalernissaa aamma avaqqukkuminaassasoq oqaatigineqarpoq, nunarsuarmi uuliaqarfissuit 25 procentiat tassaniimmat. Sikuiuitsullu nalaa immakkut aqqutinngorpat immamik oqartussaaffeqarneq oqallisissanngussaaq nutaaq, piginnittusssanermik apeqqummik nassataqartussaq.
