Kialuunniit takusinnaavaa Ostermannip sulisussarsiarinera silatusaarnerunngitsoq
Kukkunerusoq paasineqarmat atorfinititsisoq Karl Lyberthip qaartartumut milorujuppoq, siulittaasup assaani qaannginnerani.
AG-mi sapaatip akunnerani uani saqqummersumi Siumumi utoqqaanertaq Inatsisartunilu siulittaasoq Lars Emil Johansen atorfinitsitsineq pillugu naliliivoq, torrallataavallaannginnerarlugulu.
- Kialuunniit ingerlaannaq takusinnaavaa, atorfimmut tassunga Tom Ostermannip atorfinitsinneqarnera silatusaarnerunngitsoq. Akulerussuigaanni piviusorsiorunnaartoqartarpoq. Pisup takutippaa Karl Lyberth politikkikkut pisunik maluginiarsinnaassuseqanngitsoq pisunullu maluginiutinik amingaateqarluni. Pisorli aamma Naalakkersuisut siulittaasuannut eqquinerlussinnaavoq. Isornartorsiuineq tassunga aamma tutsinneqarsinnaasoq, utoqqaanertaq AG-mut oqarpoq.
Lars Emil Johansenip Hans Enoksenip Siumumit aninera aamma tupiginngilaa. Tikkuarpaami Hans Enoksenip ullut tamakkiangajallugit aalisarnermut politikki ingerlanneqartoq isornartorsiuisarsimammagu.
Lars Emil Johansenilli Hans Enoksen taperserusuppaa aalisarnermut politikkip allanngortinneqartariaqarneranut.
- Tunuliaqutit tusarniarneqarnerunissaat pisariaqarpoq. Ajornaqaaq pissaaneqarneq piinnarlugu immap qaavatigut pisussinnaasorisoqarsinnaanngilaq. Aalisartut tusarniartariaqarput, Lars Emil Johansen AG-mut oqarpoq.
