Khmer Rouge-ikkut eqqartuussisutigoortinneqalerunarput
Cambodiami siornatigut qullersarisimasaannik Røde Khmererikkunnik eqqartuussineq aallartippoq.
Siornatigut parnaarussivimmi pisortaasimasoq Kang Kek leu aamma Duch-imik taaneqartartup killisiorne-qarnera aallartippoq. Taama Danmarks Radio allappoq.
Duch-ip illoqarfiit pingaarnersaanni Phnom Penh-imi parnaarussivimmi pisortaasimavoq, Cambodiamiorpassuillu tuusintilikkuutaat parnaarussivimmi naalliutsinneqartarsimapput naggataatigullu toqunneqartarsimallutik.
Parnaarussat 14.000-it akornanni taamaallaat arfineq marluk annattutuaasimapput.
Duch-imik killisiuineq kingusinnerusukkut eqqartuussinermik kinguneqarsinnaassaaq.
Khmer Rouge-ip sakkutuuinik amiilaarnartunik eqqartuussisulersuussiniarneq 1970-ikkulli naalerneranniit ingerlanneqalersimavoq, maannakkullu parnaarussiviup pisortaanik Duch-imik killissiuineq pisinnaalerpoq, Naalagaaffiit Peqatigiit tapersersuineratigut, sakkutuummi amiilaarnartuliungaarsimasut Khmer Rouge-kkut akisussaasuinik eqqartuussinissaq sivisuumik utaqqineqarsimasoq maannakkut aallartissinnaalerpoq.
