Khalid Sheikh Mohammed eqqartuussaaleruttorpoq

marsip 15-at 2007 12:29

Al-qaeda-mi peqqarniisaarniartartut siuttuini siullersaalluni New York-imi kiisalu Washington-imi 11. september 2001-imi peqqarniisaarniarnikkut saassusinernut pilersaarusioqataasimasutut pinerluuteqarnerminik Khalid Sheikh Mohammed nassueruteqarsimavoq.

Pakistanimiulli Khalid Sheikh Mohammed-ip september-ip 11-ianni saassussinerit kisiisa pilersaarusiorsimanngilai. Eqqartuussivimmi apersorneqarluni USA-p Guantanamomi sakkutooqarfiani nassuerutigisimavai, ukiuni kingullerni 10-15-ni peqqaarniisaarniartarnikkut saassusisarnerni amiilaarnartunik pilersaarusioqataasarsimanini.

Peqqarniisaarniartartoqatigiinnik Al-qaeda-kkormiunik USA-p tigusarinninniarnerani tigusarineqarsimasut pingaaruteqarnerpaat ilagaat, Khalid Sheikh Mohammed.

Præsident, Bush Mohammed pillugu ukioq kingulleq ima oqaaseqarpoq;

- Peqqarniisaarniartartoq KSM - Khalid Sheikh Mohammed – CIA-mi ukiuni pingasuni tigummineqarsimavoq, ukiorlu kingulleq september-imi isertortumik paasiniaasartut killisiuinerminni periuserisimasaat illersorlugu præsident Bush ima nangippoq; killisiorneqartup Khalid Sheikh Mohammed-p peqqarniisaarniartartut allat Al-qaeda-meersut tigusariortorneqarnerannut paasissutissanik pingaarutilinnik nassueruteqarnermini oqaluttuussimavaatigut, amerikamilu innuttaasut saassutarineqarnerannut unitsitsisuusimalluni, George W. Bush oqarpoq

USA-mi Illersornissamut Ministeriaqarfiup killisiuisimanerit inerneri arlallit 11. septemberimi 2001-imi pisimasuinnaanngitsut saqqummiuteqqammerpaat.

Khalid Sheikh Mohammed-p pinerlunnikkut ajortuliarisimasai tassaasimapput; Balimi 2002-mi peqqarniisarniarnikkut qaartartumeerineq, aviisiliortumillu Daniel Pearl-imik Pakistanimi inuartarinnissimaneq aammalu 1993-imi New York-imi World Trade Centerimut peqqarniisaarniarnikkut saassusisimaneq.

Katillugit peqqarniisaarniartarnikkut 29-nik inuartarinnissimanerit qaartartumeeriniarlunilu pilersaarusioqataasarsimanerit Khalid Sheikh Mohammedip nassuerutigimavai. 2003-milu amerikamiut sakkutuuinit immikkut sungiusakkanik Pakistanimi tigusarineqarpoq, maannalu sakkutuutut sorsoqataasimasutut pineqarluni Guantanamomi tigusanut eqqartuussivimmi pinerluutigisimasani tamakku pillugit eqqartuunneqaleruttorpoq.