"Ketil" umiungajappoq

januaarip 13-at 2006 16:11

Nanortalimmi takornariartitsiviup angallataa "Ketil" umiulernermik kalerrisaarimmat ilaasut tallimat inuttallu marluk annaanniarneqarsimapput.

Nanortalimmi takornariartitsiviup angallataa ”Ketil ” 35 fods-tut angitigisoq, 5-nik ilaasoqarluni marlunnillu inuttaqarluni, maskiinaqarfimmigut ikuallattuulernini pissutigalugu, umiulernermi kalerrisaarut SOS atorlugu Aasiaat radioatigut ippassaq ualikkut ikiortissarsiulersimavoq.

Qujanartumik inunnik ajoqusertoqarsimanngitsoq Nanortalimmi politiit pisortaat Niels Nyvang Nielsen oqarpoq.

Angallat ippassaq Qaqortumiit Alluitsup Paa aqqusaarlugu Nanortaliliartilluni, Alluitsup Paaniit aallareerluni Sermersuup eqqaatigoortilluni, Aasiaat radioanut kalerrisaarilersimavoq.

Niels Nyvang Nielsen oqarpoq, taamaalisoqarmat ingerlaannaq Nanortalimmi qatserisartut ilagalugit umiarsuaaqqamik attartorsimallutik.

- Qatserisartut tallimat politeerlu ornigutipallapput, apuutinnginnitsinnili angallatit allat marluk umiulernermi kalerrisaarut tussaasimallugu ornigutereersimapput, ilaasullu nunamut nioorareerneqasimallutik.

Nanortalimmi takornariartitsivik 2003-mi angallat Ketil angallatigilersimavaa, taamanikkulli Nanortallip pigisaani ilaasunik angallassinermi sanitigut Qaqortumut Narsarsuarmullu angallassisalersimavoq.