Kenyami eqqissiviilliortorsuupput

Ikiuiniaqatigiiffiup Røde Korsip Kenyami immikkoortortaa isumaqarpoq Kenyami eqqissiviilliornerit ingasalluinnarsimasut. Kenyap kippasissuani præsidentimut sapaatiummat qinersisoqareernerani naggueqatigiit assigiinngitsut imminnut aporaammata inuit ikinnerpaamik 30-t oqaluffimmut qimarngusimasut ikuallagussaapput.
januaarip 02-at 2008 03:51

Illuatungeriit akersuuttut tassaapput angutit præsidentip 76-inik ukiullip Mwai Kibakip naggueqatai, Kikuyu-t aamma naalakkersuisunut illuatungilittut siulittaasuata Raila Odinga-p naggueqatai, Luo-t.

Præsident Mwai Kibaki qinersinermi ajugaasutut suaarutigineqareermat qinersinermi eqqunngitsuliortoqarsimanranik oqallinneq aallartippoq.

Qinersisoqareernerata kingorna inuit 300-t missaanniittut toqutaareerput – Nairobimi nunap inuiisa piitsooqisut najugaqarfianni Kiambiumi aamma toqoraasoqarsimaqaluni.

-Inuit kukkukuuaqqatulli toqorarneqarput, politiillu iliuuseqanngillat, takunnissimasut ilaat 28-nik ukiulik nutaarsiassaqartitsivimmut Reutersimut oqaluttuarpoq.

Inuit ikinnerpaamik 70.000-t angerlarsiaffimminniit qimarrassimapput, ikiuiniaqatigiiffik Røde Kors taama ilisimatitsivoq. Ikiuiniaqatigiiffimmeersut timmisartumiit filmiliorsimapput, illorpassuit ikuallattut, nunaatit ikuallattut aqquserngillu assersorneqartut assilisani takuneqarsinnaapput.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq