Kent Kielsenip Thomas Helveg ilinniartooqatigaa
U-18-ini nunanut allanut unammisartut sungiusaasuat Kent Kielsen Danmarkimi arsaannermi tusaamasat akornanni ilinniarpoq.
Kent Kielsenip maanna ingerlappaa pikkorinnernut sungiusaasutut ilinniarneq A-mik ilinniarnertut taaneqartartoq Europami arsaattartut kattuffissuannit UEFA-mi akuerisaasoq. 2011-ip ingerlanerani ilinniarnerup immikkoortui arlallit ingerlatissavai tassanilu ilinniaqatigisai tassaapput Ebbe Sand, Thomas Helveg, Kim Daugaard aamma David Nielsen.
- Kent Kielsenip DBU aqqutigalugu A-mi sungiusaasutut ilinniarnermigut qaffasissumik sungiusaanissaminut sakkussaqalissaaq, taassumalu saniatigut GBU-mi sungiusaasunik pikkorissaanissamut sakkussaqalissaaq assersuutigalugu fodboldskole-ni sungiusaasartut aamma pikkorissarsinnaallugit, taama nalunaarpoq Kalaallit Nunaanni arsaattartut kattuffianni GBU-mi siulittaasoq Lars Lundblad.
Kent Kielsenip naammasseqqammerpaa ilinniarnerup aallartisarnera. Tamatuma kingorna 2011ip ingerlanerani aqqusaassavai paasisassarsiorluni angalanerit aammalu sungiusaasutut misiliinerit. Tassani ilaatigut Hollandimut angalassamaaramik arlaleriarluni atlantiku ikaarlugu pikkorissariartarneq peqataanermullu akiliut akikitsuinnaanngillat.
- Qujanartumik DBU uani paasinnilluarsimavoq peqataanermut akiliummut malunnaatilimmik akikillisaasimalluni. Pakatsissutigaarpulli Elite Sport Greenland aamma GIF tapiissuteqarusussimanngimmata, taama Lars Lundblad oqarpoq.
