Kenneth Høegh: Savat marloriaammik amerlanerusinnaagaluarput
Kalaallit Nunaanni savat marloriaammik amerlanerusinnaagaluarput. Taama oqarpoq, Upernaviarsummi naasorissaanermik misileraavimmi siunnersortaaneq, Kenneth Høegh.
Kenneth Høegh isumaqarpoq, islandimiusut maligassaqqissutut savaateqarnerulersinnaasugut, taamatullu annertunerusumik imminut pilersulerluta.
- Nammineq pilersorneq isigalugu Islandimi ingerlalluartorujussuupput, uagut aamma tamanna ilikkarsinnaavarput, Kenneth Høegh oqarpoq.
Islandimi naasorissaasut peqatigiiffianni pisortamit, Sigurgeir Thorgeirssonimit, nammineq pilersorneq taperserneqarpoq. Kalaallit Nunaanni naasorissaanermut siunnersuisoqatigiinni taanna aamma ilaasortaavoq.
Sigurgeir Thorgeirsson isumaqarpoq, imminut pilersorneq pingaarnerpaasoq.
- Tamanna Islandimi politikkitta pingaarutillit ilagaat, tassa sapinngisarput naapertorlugu nerisassanik nammineq pilersornissarput. Thorgeirsson oqarpoq.
