Kenn Harper: Iqaluit Nuullu akornanni aqquteqannginnera kanngunaqaaq
Kalaallit Nunaanniit angalasut qulit, naalakkersuisunut ilaasortaq, Ark´alo Abelsen siuttoralugu Akilinermut angalanerat tusagassiortunit islandimeersunit tupigusuutigineqarpoq. Danmarkip Iqalunni aallartitaqarfianeersoq, ungasinngitsukkut Islandimi TV-kkut islandimi timmisartuutileqatigiit Iqalunnut timmisartuussisarnerminnik annertusaaqqullugit Kenn Harperip kaammattorpai.
Islandimiut tusagassiortut Iqalunniinneranni, Kenn Harper oqarpoq Nuummiit Iqalunnut timmisartukkut attaveqartoqannginnera tupinnarlunilu kanngusuummernartuusoq. Kalaallit Nunaanniit Akilinermut aqqutit naannersaat, aasaanerinnaani periarfissaasoq tassa Keflavik-ikkoorluni aqqut, ulluinnarlugu Akiliniliaassutaasinnaasoq. Kalaallilli Nunaanniit sapaatip akunnerata kingulliup ingerlanerani angalasut, Danmarkikkoorlutik ullut pingasut atorlugit Kuujjuarmut Iqalunnullu ingerlapput, tassa Nuummiit Kuujjuarmut 900 kilometerisut ungasitsigisumut 11.000 kilometerit timmisartoqqaarlutik apuupput.
Nalunami kuultisioqataasut, Procon Mining-imeersut allatut aamma ajornartumik sulisutik St. John´simiit Goose Bayimiillu timmisartunik attartukkanik angallattariaqartarpaat. Allalu aatsitassarsiorfik, Quadra Mining, Tunumi 2010-mi molybdænimik qalluileruni timmisartunik attartortariaqartarnissartik aamma aarlerigaat.
Akilinermi timmisartuutileqatigiiffiup, First Air-ip, Kangerlussuup Iqaluillu akornani timmisartuussisarnini 2001-imi unitsippaa. Air Greenlandip aamma ukioq manna siusinnerusukkut Baltimoremut angallassisarnini, ukiup ataatsip ingerlanerani 15 miliuunit koruunit sinnerlugit amigartoorutigereerlugu, taamaatiinnarpaa.
Nunatsiaq Newsimi taama allaaserinnittoqarpoq.
