Kemortilluni katsorsarneqarneq ulorianarluinnarsinnaavoq
Kræftimik nappaateqaraanni kemortilluni katsorsarneqarnissaq tamatigut pitsaasuunngilaq. Tassami kemortilluni katsorsarneqarneq kræftimik napparsimasorujussuarnut ulorianarluinnarsinnaammat. Tamanna tuluit nalunaarusiaanni nutaami atuarneqarsinnaasoq, Dagens Medicinimi allaaserinnittoqarpoq.
Allattoq Louise M. Kleemann
novembarip 14-at 2008 07:54
Misissuinertigut paasineqarpoq, kræftimik napparsimasut 600-t kemortillutik katsorsarneqarneranni 27 procentit taamatut katsorsarneqarnertik toqqutigisimagaat imaluunniit tamanna toqujaarnerannut patsisaaasimasoq.
- Napparsimasup kemortilluni katsorsarneqartussanngortinneqarnerani, tamanna napparsimasup timimigut sapissannginneraa tamatigut naliliiffigineqartariaqarpoq.
Kemortilluni katsorsarneqarneq timimut sakkortuumik sunniuttarpoq, taamaattumillu minnerpaamik piumasarineqartariaqarluni katsorsarneqartussaq pisussinnaassasoq, nakorsaaneq Lisa Sengeløv oqarpoq.
Misissuinermi paasineqarpoq kræftertut 35 procentiinnaasa kemortillutik katsorsarneqarnertik iluaqutigigaat.
