Keld Askær uggorinagulu uggoraat

SIK-p siulittaasua ippassigamikkunni oqarpoq, Keld Askærip taamaatilernera pillugu ilaasortatik qissatinngitsut, taassumali isumaa tamarmik isumaqatiginngilaat. Radioavisimiit sinerissamut tunisassiorfeqarfiusunut sianeqattaarluta sulisut sinniisaat oqaloqatigaavut.

- Neriuppunga ittunngortussap Keld Askærip tumai malissagai. Keldip ingerlatsisimanera ukiuni tallimani kusanartoq inuiaqatigiinnullu pitsaasuusimasoq. Royal Greenlandip iluani aviiseqalersimavoq, paasissutissanik sulisunut annertunerusumik tunioraasalerput. Siornatigut ukiup affakkaartumik paasissutissiisoqartaraluartoq, maanna qaammatit tamaasa paasissutissiisoqartalerpoq. Keldip sulisut suleqatiginissai pingaartippai, Ilulissani Aasiannilu sulisunut sinniisoq, Jonas Madsen, oqarpoq.

Qeqertarsuarmili tunisassiorfiup sulisuisa sinniisaat allatut oqarpoq, Jess G. Berthelsenip oqaasii taperserpakka, sulisorpassuit soraararsimapput, Aasiaat fabrikkia matuvoq. Oqarniartoqarpoq RG Academy pilersissimammagu soraalernera uggornartuusoq, kisianni eqqarsaatigisariaqarpoq, aamma suliffik sukaterivigineqarpoq, sukaterisoqarpat sulisut sulinerulissapput, timikkullu ippiornerulerlutik nakorsiaqattaarlutillu nappaateqarnerulersarput, Qeqertarsuarmi tunisassiorfiup sulisuisa sinniisaat, Jakob Møller, oqarpoq.

Sulisut sinniisaasa ilaat suliffimminniinngillat, ilaallu tamatuminnga oqaaseqarumanatik.