Kbh.-imi perulluliornerit allamiut allaaserisaqattaarpaat

Københavnip aqquserngini perulluliornerit nunarsuarmi nunat illoqarfiisa annersaasa tusagassiorfiinut maanna siammakaalersoq, Danmarks radiop tusarliuppaa.

Amerikamiut TV-iikkut nutaarsiassaqartitsiviisa ilaata CNN-p nittartagaani København perulluliorfiugajuttutut allaaserineqarpoq. Taamatuttaaq Tuluit Nunaanni nutaarsiassaqartitsiviup BBC-p nittartagaata saqqaani Københavnimi perulluliornerit qulequttatut pingaarnertut allaaserineqarput.

Ilaatigut allaaserineqarpoq benzinamik qaartitsinerit, biilit ikuallanneqaqattaartut, gassimik qulliliornartumik aniatitsinerit, inuppassuillu 100-t taamannaat tigusarineqarsimasut Københavnimi politiinit ulluni kingullerni ulapputigineqaqisut.

Norskit aviisiata Aftenpostenip allaaseraa Københavnimi politiit nunami allamiunik pikititsinianik ujaasinerarlugit.

Aammattaaq norskit aviisiata Verdens Gangip allaaseraa, norskit arlallit ullumi tigusarineqarsimasut. Taamatuttaaq Svenskit tusagassiorfiata Expressenip akerliussutsimik takutitsineq tamaat malinnaaffigilluarpaa.