Kbh.-imi inuusuttorpassuit parnaarunneqarput
Københavnimi inuusuttut illuata tunineqarnerata kingorna politiit inuusuttunik sisamanngormalli illumiit anioraatitsillutik aallartimmatali maannamut inuit 650-ingajaat politiinit tigusarineqarput. Taakkunannga inuit 218-t suli parnaarusimaneqarput. Taakku politiinut nakuusersimapput aqqusinermilu eqqissiviilliortitsisimaqalutik. Inuit 15-t maanna killisiorneqareerlutik iperagaareersut politiinit oqaatigineqarpoq.
Nutaarsiassaqartitsivimmi ritzaumi oqaluttuarineqarpoq, inuusuttut 56-t 18-t ataallugit ukiullit tigusarineqarsimasut taakkunanngalu 20-t parnaarusimaneqarallassallutik.
Inuusuttut tigusarineqartorpassuit akornanni nunami allamiut 140-simapput, ilaat europap ilaanninngaanneersuullutik, taakkunanngalu 20-t svenskiusimapput 20-t norskiullutik 25-illu tyskiullutik. Ataasiakkaallu Amerikamiuusimapputtaaq.
