Kay Dam Steffensen nersornaaserneqarpoq
Namminersornerullutik Oqartussat nersornaasiuttagaat Bikubenimi pisortaasimasumut Kay Dam Steffensenimut ullumi inatsisartuni siulittaasumit Jonathan Motzfeldtimit tunniunneqarpoq.
Kay Dam Steffensen nunatta aningaasarsiorneranik ineriartortitseqataavoq. 1960-kkut naajartorneranni aningaaseriviit nunatsinni immikkoortortaqarfittaartornerini Nunabankiusimasumi Steffensen pisortaavoq. Nunabankiusimasumilu siulersuisuni ukiuni arlalinni siulittaasuusarsimavoq. Nunafondip Den kongelige Grønlandsfondillu siulersuisuini maanna ilaasortaavoq.
Kay Dam Steffensenili siullerpaamik nunatsinnukarami 1968-imi aningaasarsiornerup inerisarneqarnissaa pillugu nunatsinnukanngilaq:
- Taamani Jens Rosing ilagalugu qalerallit nungukkiartulersut Ilulissat eqqaani filmiliariniarlugit Kalaallit Nunaannukaqqaarpunga. Ajoraluartumilli filmiliorsinnaasimanngilagut atortorissaarutitta uuliataa qerisuaannarmat. Tamatuma kingorna angerlarpunga aatsaallu aappaani ukiut sisamat Kalaallit Nunaannut suliartorpunga, Kay Dam Steffensen oqarpoq.
Taanna aperaarput Nersornaaserneqartussaalluni qanorigineraa, ima akivoq:
- Uannut pingaaruteqartorujussuuvoq. Qaammatit arlallit matuma siorna Narsarsuarmiitsillunga sianerfigitikkama iluunngarma tupallersimavunga tulluusimaarlungalu. Ineriartornermi Kalaallillu Nunaanni aningaaseriviit inerisarneqarneranni suliniuteqaqataasimasutut misigisimavunga, taamaattumik nersorneqarniarnera tulluusimaarutigivara, Kay Dam Steffensen oqarpoq.
Nunatsinnilu aningaaseriveqarneq qanoq pingaaruteqartiginersoq aperigatsinni ima akivoq:
- Aningaaseriveqarnissaq ullutsinni pingaarutilerujussuvoq. Nunat ataasiakkaat aningaaseriveqanngitsuugunik nunanut allanut attaveqarsinnaaneri killilerneqassapput. Aningaasanik kaaviiaartitsisoqarsinnaassanngikkaluarpoq aningaaseriviit ullutsinnut naleqqussakkat ammarneqarsimanngitsuuppata, aningaaserivimmi pisortaasimasoq Nersornaaserneqartorlu Kay Dam Steffensen taama oqarpoq.
