Katuaq pisortartaassaaq

Nunatta kulturikkut illorsua nutaamik pisortartaartussanngorpoq, nunatsinni takornariaqarnermut inuussutissarsiornermullu siunnersuisoqatigiinni tusagassissartoq Julia Pars pisortanngortussaammat.

Katuap maannamut ingerlasimanera ajunngitsutut Julia Parsip nalilerpaa, nukittorsarneqarsinnaaneralu aamma oqaatigalugu:

- Illorsuaq kulturikkut qitiuvoq, suliniutinik nammineq aallartitsisinnaalluni. Soorlu isiginnaartitsisoqartarpoq, tusarnaartitsisoqartarlunilu, siunissamili tamanna nukittorsartariaqassaaq, Julia Pars oqarpoq.

Katuaq Nuummiunuinnaq neqeroorutaasoq tusartarparput, tamannali ilumoorpa? Julia Pars allatut isumaqarpoq:

- Naamik. Uanga isumaqarpunga Katuaq tassaasoq nunatta kulturikkut illorsua, tassa sinerissami kulturikkut aaqqissuussinerit Katuamit aamma aaqqissuusseqataaffigisimammagit. Tamanna siunissami aamma ingerlaqqikkumaarpoq, Julia Pars oqarpoq, nangillunilu:

- Isumalluarpunga, aammami isumaqarama kulturi nunatsinni siunissaqarluartoq. Takornariat nunatsinnukartartut amerliartortussaapput, nunarpullu avammut pitsaasumik kiinnerniarutsigu kulturi pingaaruteqarpoq, Julia Pars naggasiilluni oqarpoq.

Juaaka Lyberth Katuami maanna pisortaavoq, Julia Parsilu atorfittaamini oktobarip aallaqqaataani sulilissaaq.