Katuaq nutaamik pisortartaassaaq
Isumaqatigiissuteqarnerup kingunerisaanik Juaaka Lyberth Katuami pisortatut tunuassaaq. Tamanna pissaaq kingusinnerpaamik ukioq manna aggustip qaammataata aallaqqaataani.
Ukiut aqqaneq marlungajaat Katuami sulereerluni, taakkunannga ukiut arfineq pingasut pisortatut, Juaaka Lyberth isumaqarpoq piffissanngortoq pisortatut atorfik allamik inuttalerneqarpat.
Tunuarniuteqarnermut pissutaavoq, Katuap anguniagassatut iliuusissatullu pilersaarutai nutaat maanna aallarnisarneqalersussaammata.
Suliap ingerlanerani Katuap killiffigaa, pisortaqarnikkut sulisoqarnikkullu nutaamik qaammatini tullerni aaqqissuusseqqinneqarnissaa.
Katuami sulineq ulloq siulleq novemberimi 1995-imi kisimiillunga atorfineqqaaramali ullumikkumut sulisut 45-t peqatigalugit ingerlatsinitsinnut nalissaqanngitsumik nuannarisimavara, Juaaka Lyberth oqarpoq. Aamma oqarluni, nukiit nutaat aqutsineq ingerlatilerpassuk, peqqinnartuussasoq, tassuunakkullu ineriartorneq nutarterinerlu qarmasissioqataaffigissagaat.
”Nunatsinni atuisartutta Kulturip Illorsua namminerisamittut pigilersimavaat atulerlugulu. Annerusumillu uanga piumasaqarsinnaanngilanga”, Katuami pisortatut augustimi tunuartussaq, Juaaka Lyberth, oqarpoq.
