- Piffissarujussuaq aamma atortarparput aaqqissuussat nalilersortarlugit. Aamma sianeqattaartarpugut Namminersorlutik Oqartussanut: imaasiorutta iluatsissinnaavarput, imaluunnit imaasiorutta una? Taamaasioqattaartarpugut, Arnakkuluk Jo Kleist oqarpoq.Assi: Katuaq

Katuaq corona pillugu malittarisassat pillugit: Susinnaanerluta paasisinnaanngilarput

Kulturip illuata Katuap coronap nalaani kulturikkut illorsuarmi susoqarsinnaasoq susoqaqqusaannginnersorlu pillugu malittarisassat erseqqissut paaserusuppai. Malittarisassat Danmarkimisulli ittut amigaatigineqarput.

Danmarkimi inuit amerlanerpaamik 100-it tamat ornissinnaasaanni katersuussinnaapput. Kulturimulli ministereqarfiup danskit kulturikkut suliaqartut katersorlugit qanoq oqaasissaqarnersut tusarnaarpai – tamannalu pissutigalugu najoqqutassat assigiinngitsut anguneqarput.

Assersuutigalugu aaqqissuussinerni inissat ilaat inoqanngippata inuit amerlanerpaamik 500-it peqataasinnaapput.

AAMMA ATUARUK Sulisitsisut Namminersorlutik Oqartussat isornartorsioraat: Corona pillugu malittarisassat tunngavilersugaalluanngillat

Nunatsinni allaaneruvoq. Malittarisassat aappaagu januaarip ulluisa 31-anut atuuttut naapertorlugit inuit illup iluani amerlanerpaamik 100-it katersuussinnaapput. Silamilu amerlanerpaamik 250-ioqqusaallutik – taavalu kommuninit allanit peqataajartortoqaqqusaanngilaq.

Inissaq atorneqanngitsoq

Tamannalu Katuap pisortaata, Arnakkuluk Jo Kleistip pakatsissutigaa.

Taassuma nunatsinni kulturikkut suliaqartunut assingusumik erseqqissumillu peqarnissaa ujartorpaa. Kalaallimmi Nuummi kulturikkut illorsuani inissaqarluarpoq.

Katuaq pillugu:

 

Kulturikkut aaqqissuussinerit Katuap kulturikkut illorsuartut pingaartumik suliassarai.

  • Katuaq nammineq ingerlataminik sutorniartarfeqarpoq, ataatsimiittarfeqarpoq ataatsimeersuartaqarfeqarlunilu.
  • Katuao peqatigiiffiit, suliffeqarfiit, suliniaqatigiiffiit inuillu ataasiakkaat kulturikkut suliaqarnermeersut suleqatigai.
  • Katuaq Namminersorlutik Oqartussanit Kommuneqarfik Sermersuumiillu ingerlatsinermut ukiumoortumik aningaasaliiffigineqartarpoq. Ukioq manna aningaasaliissutit katillugit 10,2 millionit koruuniupput.

 

Tusarfik: Katuaq

 

Katuap aaqqissuussinerit amerlasuut marsimili taamaatiinnarlugillu allanngortippai. Maannakkut tusarnaartitsisoqartarpoq, oqalugiartoqartarpoq filmertitsisoqartarlunilu, isersimasulli 100-it qaangeqqusaanngilaat.

- Illorujussuaqarpugut, Katuaq illorujussuuvoq, inuppassuarnik inoqarsinnaalluni, soorlu paarlersuarmi inuit 1200-juusinnaagaluarput, taamatut akuerisaalluni, taamaattumilli inunnut 100-inut killeqarnera pilersaarutitsinnut sunniuteqarpoq, Arnakkuluk Jo Kleist oqarpoq.

Hans Lyngep inersuani biografertarfimmi inunnut 500-inut inissaqarpoq.

Taassumalu killilersuinerit qanoq sivisutigissaneri aamma ernumagai. Naalakkersuisut killilersuinernik maannamut 2021-mi januaarip ulluisa 31-annut sivitsuipput.

- Aamma pissanganarpoq una qanoq sivisutigisumik atuutissanersoq, soorlu massakkut januaari naanissaata tungaanut aamma sivitsoqqippaat, taannartaalu qanoq sivisutigisumik una atuutissanersoq uagullu suliatsinnut pilersaarusiornitsinnut qanoq sunniuteqarnissaa.

Aningaasaqarnermut ilungersunartoq

Katuami siulersuisut corona ilungersunartorsiortitsilinngikkallarmat 715.000 koruunit 2020-mi amigartoorutaasussatut naatsorsorpaat.

Katuamili aasaanerani sulinngiffeqalinnginnermi naatsorsuinerit kingulliit naapertorlugit kulturikkut illorsuup 1,5 millionit koruuninik amigartooruteqarnissaa siulittorneqarpoq. Tamanna siullermik naatsorsuutigisamit marloriaataavoq.

AAMMA ATUARUK Politikerit katersuussinnaapput: Kalaallimmi atuakkiortut katersuussinnaappat?

Qanoq pilersaarusiussaagut?

Katuaq corona ilungersunartorsiortitsilermalli aaqqissuussisarnissaminut atatillugu aaqqiissuteqartoqarnissaanik neriuuteqarluni Namminersorlutik Oqartussanut saaffiginneqattaalerpoq.

- Taamaattumik nalunaarfigisaqattaarnikuuagut uagut qanoq inissisimanerluta, malinnaatitsiniarsarivugut, tassanilu uagut assut pisariaqartitarput aamma pisariaqartissimasarput, tassa paasissutissiisoqarnissaa paasinaqqissaartumik: Sunarpiaruna iluatsissinnaagipput, qanorpiaq ingerlariaqqissinnaavugut?, Arnakkuluk Jo Kleist oqarpoq.

Erseqqinnerusumik paasissutissiisoqaraluarpat kulturikkut illorsuarmi sulisut suna periariarfissaanersoq sunalu ajornarnersoq pillugu apereqattaarunnaassagaluarpat.

- Piffissarujussuaq aamma atortarparput aaqqissuussat nalilersortarlugit. Aamma sianeqattaartarpugut Namminersorlutik Oqartussanut: imaasiorutta iluatsissinnaavarput, imaluunnit imaasiorutta una? Taamaasioqattaartarpugut, Arnakkuluk Jo Kleist oqarpoq.

Namminersorlutik Oqartussat: Tassa taamaassappat

Immikkoortortaqarfianili pisortaq, Karl Davidsenip najoqqutassat qularutigigaanni taama taakku tamarmik nakorsaaneqarfiup nittartagaani nun.gl-imi pissarsiarineqarsinnaasut KNR-imut allappaa.

- Naalakkersuisoqarfiup paasissutissat taakku, kalaallit oqartussaasuisa innersuussutaat inuiaqatigiinnut tamanut matumani kulturikkut suliaqarfiit ilanngullugit atuuttut nalilerpaa.

Isummersuutit

inatsisartut-sal-sep2019.jpg

Inatsisartut Ukiakkut Ataatsimiinnerat



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat