Katuaq adventimi tusarnaartitsinermut juullimullu qiortaatitsinermut qaaqqusisoq
Nuummi Katuami ileqquusumik adventip sapaataani tusarnaartitsisoqassaaq, tamannalu Hans Lyngep Inersuani nal. 14-imit pissaaq.
Tusarnaartitsinermi ilaatigut nunatsinni erinniortorsuit ilaat Martin Løvstrøm kitaarertartoq Niels Ole Møller peqatigalugu tusarnaartitsissaaq.
Nipilersornermik ilinniarfimmi nivissat erinarsoqatigiit Pipaluk Lynge Berthelsenimit siulersorneqarlutik aamma juullisiutinik erinarsussapput.
Nipilersoqatigiillu nuummiut TIU tusarnaartitsissapput erinarsoqatigiillu Nipi tussiutinik juullisiutik aamma tusarnaartitsissallutik.
Katuap adventimi tusarnaartitsinerani aamma islandimiut erinniarsuarnik tusarnaartitsisartut; pattattartoq, cellortartoq klarinettertartorlu tusarnaartitsissapput. Taakku aamma erinnanik juullisiutinik tusarnaartitsissapput.
Sapaammi tusarnaartitsinissaq sioqqullugu aamma Katuap paarlersuani meeqqanut juullerpalaartunik kaaginik pinnersaatitsisoqassaaq qiortaatitsisoqarlunilu. Nuuk Imeq paarnap isseranik ((saftimik)) akeqanngitsumik sassaalliuteqassaaq. Aaqqissuussineq nal. 12-imit 13.30-mut pissaaq.
Erinniarsuarnillu nuannarisaqaraanni islandimiut erinniarsuarnik tusarnaartitsisartut tallimanngorpat nalunaaqutaq 20 aamma tusarnaartitsissapput.
