Katuaq 2008-imi amigartooruteqalaarpoq

Nuummi Kulturip illorsua Katuaq 2008-mi 56.000 koruuninik amigartoorpoq. Tamanna ukiup siulianut naleqqiullugu pitsanngoriarnerujussuuvoq, tassami ukiup siuliani Katuaq 790.000 koruuninik amigartoorfiummat.
apriilip 06-at 2009 07:16

2008-mi angusat sulisut nikerarnerannut atatillugu aningaasartuutinit sunnersimaneqartut, Katuamik ingerlatsisut angusamik naammagisimaarinnittut ilisimatitsissutigaat.

Katuami tusarnaartitsinerit 2008-mi 43-uupput, taakkualu saniatigut Kulturikkut Illorsuup aaqqissugaanik sinerissami 26-eriarluni tusarnaartitsisoqarluni. Tamatuma saniatigut isiginnaartitsinerit 24-t neqeroorutigineqarput, taakkua tassaallutik isiginnaartitsissutit qulit, eqqumiitsulianillu saqqummersitsinerit aqqaniliusimapput. Tamakkua saniatigut filmit 109-t filmeriartarfiup takutippai, taakkualu 56.000-init isiginnaariarneqarput.

Katuaq aamma ataatsimeersuarnermik ingerlatsiviusarpoq, 2008-milu 90-eriarluni ullormi ataatsimi ataatsimiittoqarpoq, aamma 26-eriarluni ullormit ataatsimit sivisunerusumik ataatsimeersuartoqarlunilu pikkorissartoqarpoq. Taakkunani peqataasut 7.300-t missiliorpaat.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq