Katuami unnugu isumasioqatigiissitsisoqassaaq

Piniarnermik inuussutissarsiuteqarneq pillugu isumasioqatigiissitsinissaq Katuami unnugu nalunaaqutaq arfineq-pingasunut aallartissaaq. Piniarnermik inuussutissarsiuteqarnerup inissisimaffia siunissaalu sapaatip akunnerup massuma ingerlanerani sammineqassaaq.
februaarip 18-at 2008 05:20

Peqataasut 75-it missaanniissapput, quleqatarineqartussarlu tassaavoq: ”Pisuussutitta uumassusillit piniarneqarnerisa piujuartitsinissamik tunngaveqarluni aqunneqarnerat”.

Pisuussutit uumassusillit piujuartitsinissamik tunngaveqarluni iluaqutigineqarnerat, taakkununngalu ilanngullugit nunatsinni/nunani tamalaani pisussaaffiit sammisassanut ilaassapput.

Uumasunik nakkutilliisarnerit uumasulerituullu piniartullu suleqatigiinnerat sammineqassallutik, qanoq iliornikkullu piniarnermik inuussutissarsiuteqarnerup aningaasaqarnikkut atugassarititat siunissaat pingaarnertut sammineqassallutik.

Isumasioqatigiittussat 75-it missaanniipput, pisortaqarfimmi atorfillit, piniartut, Pinngortitaleriffimmi atorfillit, piniarnermik nakkutilliisut asilerisullu peqataassagamik. Kommunini najukkanilu naalakkersuinikkut sulialinnik sinniisut isumasioqatigiinnermi aamma peqataassapput.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq