Katuami tusarnaartitsinermi bilitsiusaaliortoqarsimavoq

Nipilersortartut Naneruakkut Zikazakkullu decembarip 29-ianni Katuami tusarnaartitsineranni bilitsiusaat 50-t isissutigineqarsimasut paasineqarsimavoq.

Isissutissatut bilitsit 700-t USA-mi immikkut sanatitaapput, taakkulu assileqqissaarlugit bilitsit 50-t sananeqarsimapput

Juulli sioqqullugu bilitsit 700-t tamarmik tunineqareersimapput.

Bilitsit assililluaqqissaarneqarsimapput allaat matumi paarsisunit malugineqarsinnaasimanngillat taamalu bilitsiusaajutillit tajanik uppernarsaatinik tunineqarsinnaasimallutik.

Tajat isissutigineqartussat tamakkerneqarmata – isaasoqaannalermallu bilitsiusaat atorlugit isaasoqalersimasoq pasitsattoqarpoq.

Bilitsinik eqqortunik pisisimasut pakatsisikkumanagit allatut ajornartumik isaasut bilitsillit tamarmik isaatinneqaannartariaqarsimapput.

Bilitsiusaaliortoqarsimanera Katuap tungaaniit ajuusaarnartuutinneqarpoq, taamalu tusarnaariat isumannaatsumik Katuamiinnissaannut soqutigittaalliornertut isigineqarluni. Tamannalu tunngavigalugu siunissami tusarnaartitsisoqaqqinnissaanut isaasut bilitsii elektroniskiusumik scannerlugit misissorneqartalissapput.