Katuami balletsernialerput
Kulturikkut illorsuaq, taamatullu Nunarput, Nunatta oqaluttuarisaanerani siullerpaamik, Den Kongelige Balletsimit tikeraarneqalerput.
Suleqatigiinnissamik Det Kongelige Teaterimik isumaqatigiissummut atatillugu taama pisoqalerpoq, taamaammat balletsimik qitilluni isiginnaartitsineq Nunatsinni siullerpaaq juunip ulluisa tallimaanni pissaaq.
Inuit 18-it, qitittartut, teknikerit, Den Kongelige Balletsimilu pisortaq Nuummut tikissapput, ilaatigut isiginnaartitsissutigissallugit balletsi ilisimaneqarluartoq, isiginnaarlugulu qalipaatigissaartorsuaq, Blomsterfesten i Genzano, taava aamma tusaamasarsuup allap, tassa Napoli-p, immikkoortuisa pingajuat, Bournonvillemit suliaq.
Den Kongelige Balletsip angalaarnermini tikissavai Savalimmiut Kalaallit Nunaallu, qitittartullu, Balletmester, Frank Andersen, naapertorlugu, qilanaaqaat.
- Kongens Nytorvimi avatangiisit toqqissisimanartut sungiusimasavullu qimannissaat, allarluinnarmullu angalanissaq, immikkuullarissuuvoq, Frank Andersen oqarpoq.
- Kongelige Teaterimeersugut oqartarpugut, Danmarkip isiginnaartitsisartorigaatigut. Taamaammat qitittartuutitta pikkorinnersaasa Kalaallit Nunaannut Savalimmiunullu angalanissaat, takutitassiarisartakkattalu pitsaanersaannik takutitsinissaat assut nuannaarutigaarput. Isiginnaartussatta naapinnissaat qilanaareqaarput, taakkumi Kongens Nytorvimi takusimassagunanngilaatigut, Frank Andersen oqarpoq.
