Katuami arfininngorpat Hammond Time-ertoqassaaq

Aleqa Hammond matumani pineqanngilaq, pattagissamillu Hammondimik nuannersumik nipilersorneq. Kjeld Lauritsen, Uffe Steen, Søren Frost aamma Christina Dahl bluesimik jazzimillu arfininngorpat unnukkut pattagiaq Hammond pingaarnertut nipilersuutigalugu nipilersussapput.
aggustip 28-at 2013 07:46

Kjeld Lauritsen ilaatigut nipilersoqatigiinni "The Organizers"-ini amerikamiumik saxofonertartumik Bob Rockwellimik nipilersoqateqarsimasoq Hammondersuarimik nipilersortuussaaq.

Lauritsenip Katuami tusarnaartitsinissamut ilagissavai kitaarertartoq Uffe Steen, tumerparpaartartoq Søren Frost saxofonertartorlu Christina Dahl. Nipilersortartut taakku pingasut nunani avannarlerni jazzimik bluesimillu nipilersornerup silarsuaani ilisarisimaneqarluarput.

Hammondtime in Nuuk arfininngornermi aggustip 31-ini nal. 22.00-imit unnuap qeqqata tungaanut tusarnaartitsissapput. Tamanna Katuap inersuaaraani pissaaq isernerlu 75 koruuneqassaaq.