Kattutinngitsoorneq tuniniaanermut pissutaavoq
Danske Bankip Grønlandsbankimi piginneqataassutsiminik tunisinera pissuteqarpoq Grønlandsbankip Vestjysk Bankillu aasaq kattunniarnerigaluata iluatsinngitsoorneranik. Aningaaseriviit kattunnissaat Danske Bankip kissaatigisimagaluarpaa, kattunnissamulli pilersaarutit taamaatinneqarput, naalakkersuisut Nunafonden aqqutigalugu naaggaarmata.
Grønlandsbankenip nunatsinni siunissami angerlarsimaffeqannginnissaa aningaasanut naalakkersuisup Josef Motzfeldtip naammagisimanngilaa, taamatuttaaq piginneqataasut nunatsinneersut kattuttoqassappat sunniuteqarsinnaajunnaarnissaat aarlerigisimallugu. Piginneqataasut mikinerit arlallit kattunnissamut aamma akerliullutik taamani taaseqataapput.
Grønlandsbankenili aningaaserivillu alla siunissami kattuttariaqalersinnaasut, ingerlatseqatigiiffinnik naliliisartut nuimanerit ilaat Bjarne Jensen aasaq naliliivoq. Taanna isumaqarpoq, Grønlandsbanken aningaaserivimmut allamut siunissami kattutinngikkuni unammillersinnaajunnaariartulissasoq, taamaattumillu ukiut marlussuit qaangiuppata suleqatissarsiortariaqalernissaa takorloorsinnaallugu.
Grønlandsbankenip pisortaanera Svend Erik Danielsen oqarpoq, Danske Bankip piginneqatiginnissutiminik tunisinera tupaallaatiginagu, Danske Bankip piginneqatiginnissutini tunerusullugit ukiuni kingullerni nalunaarutigisareermagu, taamaattumik taama pisoqarsinnaanera sillimaffigereersimalvarput, Svend Erik Danielsen oqarpoq.
