Kattussuussineq ernumanartoqartippaat
Kommunit sisamaannanngorlugit kattunnissaat politikkikkut ukiuni aggersuni akuerineqassappat, Nanortallip kommuniani atorfillit ilaat nuuttariaqassapput.
Imaassinnaavoq atuarfiit qitiusumiilerpata atuarfinni pisortaqarneq taamaatinneqartoq - aamma Nanortalimmi inuussutissarsiornermi siunnersuisarfik immaqa nuuttariaqassaaq, taamaattoqassappat kommuni aningaasaqarnikkut ingerlasinnaanngitsoq, Borgmester Kristine Raahauge oqarpoq, kommuninilli allanik suleqateqarusunnertik attatiinnarnerarlugu.
-Assersuutigalugu: aalajangerneqareerpoq akileraaruseriviit 2007-mi qitiusumiilissasut. Nanortallip kommuniani atorfiit arfiniliupput, kisianni sisamat tunngaviusumik akileraaruserivimmi suliaqarput. Tassa ataaseq inuit allattorsimaffiani kukkunersiuisorlu ataaseq ilanngullugit arfiniliullutik. Atorfillit marluk atorfinnut allanut qinnuteqarput, takorloorutsigu: sisamat aallassappata tamarmik immaqa sisamanik tallimanilluunniit inoquteqarlutik, tamanna illoqarfitsinnut sunniuteqartorujussuussaaq. Tassa kommunip allaffianuinnnaanngitsoq, kisianni illoqarfimmi inuussutissarsiortunut tamanut. Eqqarsarnartorujussuuvoq, borgmester Kristine Raahauge oqarpoq.
Kommunini immikkoortoqarfiit qitiusumik nussorneqarnissaat politikkikkut aalajangiusimaneqaannarpat, Nanortallip kommuniata atorfiit 16-it annaassagai, borgmester Kristine Raahauge aamma oqarpoq.
