Kattussornissamut isumaqataasoqarlunilu akerliusoqarpoq
Kommunit aaqqissuussaanermut isumalioqatigiissitaasa siunissami pilersaarutitut siunniussaat borgmesterit ilaannit isumalluarfigineqarlunilu isumaqatigineqanngilaq.
Kommunit aaqqissuussaanermut isumalioqatigiissitaasa siunissami kommunit kattussuunnissamut pilersaarutitut siunniussaat Kommuneqarfik Upernavimmit isumalluarfigineqarpoq. Tamatumunga borgmester Jens Emanuelsen Atassummeersoq avannaata kommunitut ataatsitut kattunnissamut siunniussat kommunalbestyrelsmiit oqallinnerup kommuneqarfiit kattuffiannut inassuteqaatitut ingerlateqqissimasaanut naapertuunnerarpai.
- Taamatut inassuteqaateqarnermut tunngavigineqarput apeqqutit sisamat pingaartinneqarutillit. Siullertut avannaani inuussutissarsiutitigut ataatsimoorussamik aaqqissuussinissat, aappaattut, silaannakkut angallannerup aaqqissuussiffiginissaa, pingajuattut takornariartitsineq sisamaattullu avannaani kommunit inuussutissarsiornikkut assigiikannersumik ingerlatsiviunera tunngavigalugu aaqqissuussinissaq, Jens Emanuelsen nassuiaavoq, nangillunilu:
- Kommunalbestyrelsimit pingaartillugu ullumikkut Namminersornerullutik Oqartussanit akisussaaffigineqartut kommuninit akisussaaffigineqalernissaat oqariartuutigaa, Jens Emanuelsen nassuiaavoq.
Kommunit oqartussaaffeqarnerat eqqarsaatigalugu siunissami kommunit kattussuunnerisigut ullumikkut aporfiusartut qaangerneqarsinnaassasut borgmesteri Jens Emanuelsen aamma isumaqarpoq.
- Assersuutigalugu aalisarnermi periarfissat eqqarsaatigalugit Namminersornerullutik Oqartussanut "kasuttoqartaarnerit" assersuutigalugu qaleralinniarnermi akuersissutinik piniaqattaarnerit, - tamakku silaannarmiittut maanna ipput. Taamaammat siunissami ukiumiit ukiumut pilersaarusiornerit atulissappata taamatut aaqqissuussaanermi isumalioqatigiissitat siunniussaat iluarinartorujussuuvoq, Jens Emanuelsen oqarpoq.
Kommunit kattussuunnissaannut aaqqissuussaanermi isumalioqatigiissitap pilersaarutigisatut siunniussaat Nanortalimmi kommunalbestyrelsemit isumaqatigineqanngilaq. Bormesteri Siumumeersoq Nikolaj Ludvigsen oqarpoq kujataani kommunit kattutissagaluarpata suliffissat Qaqortumut nussorneqarnissaat annilaangartoqartippai, illoqarfiit minnerit inuerukkiartulernerannit kinguneqassangatillugu. Pilersaarutitut siunniussat naalakkersuisunit akuerineqassappata inuinnaat oqartussaaqataanerat sumiinnersoq Nikolaj Ludvigsenip apeqquserpaa.
