Kattusseqatigiit qinigassanngortitatik partiitullu ilisarnaatissat saqqummiuppaat
Kattusseqatigiit Partiiata ullumi inatsisartunut qinigassanngortitani partiillu nutaap immikkut ilisarnaatai tamanut saqqummiuppai.
Kattusseqatigiit partiiata innuttaasut atugarisaasa pitsanngorsarneqarnissaat kissaatigaat. Partiip nutaap qineqqusaarutaat qulinik immikkoortortalik qimerluaalaarlugu tamanna ersarippoq.
Partiip anguniarpaa: ”innuttaasut atugarisaannik sumiissuseq apeqqutaatinnagu pitsanngorsaaneq.” Uku sulissutigerusuppaat: ”nunatta pissarititaanik uumassusilinnik uumaatsunillu atorluaanerulernissaq anguniarparput” – kissaataat ukuupput: ”utoqqarnut, innarluutilinnut siusinaartumillu tigusartagalinnut atugarissarititaasut pitsaanerusut” aamma: ”timersortunut atugarititaasut pitsaanerusut”.
Kattusseqatigiit nunami imaanilu inuussutissarsiutinik siuarsaarnissaq peqataaffigerusuppaat, atuarfiit pitsaanerusut ilinniartitaanerlu nunatsinnut tulluussagaq pilersaarusiorluagarlu sulissutigerusuppaat.
Kattusseqatigiit Partiiat 14-nik qinigassanngortitsivoq. Qinigassanngortittut amerlanersaat Ilulissaneersuupput, qinigassanngortittunut ilaapput Anthon Frederiksen aamma Niels Fly Olsen – taakku februaarimi Folketingimut aamma qinigassanngortipput. Nuummi Loritha Henriksen aamma siusinnerusukkut juullip inuatut sulisimasoq Ludvig Ringsted Kattusseqatigiit Partiiat sinnerlugu qinigassanngortipput.