Kattusseqatigiit qinigassanngortitaat tunuarpoq
Folketingimut qineqqusaarneq aallartilaaginnartoq Kattusseqatigiit folketingimut qinigassanngortitaat ataaseq tunuareerpoq. Tunuartoq tassaavoq Nuummeersoq Soré Mølgaard, taassumalu qinigassanngortinnerminit tunuarnini oqaaseqarfigerusunngilaa.
Kattusseqatigiilli siulittaasuat Anthon Frederiksen oqarpoq, qineqqusaarnermut piareersarfissaq sivikigalugu Soré Målgaardip qinigassanngortinnini tunuartikkaa.
- Pingasuulluta naapeqatigiinnissatsinnut iluamillu piareersarnissatsinnut piffissaq sivikippallaartoq Soré Mølgaard tunuarpoq, Anthon Frederiksen radioaviisimut ullumi nassuiaavoq.
Soré Mølgaardillu tunuarnera uggornartuusoq, aalajangernerali ataaqisariaqartoq Anthon Frederiksen erseqqissaavoq.
Soré Mølgaardillu erseqqissarpaa Kattusseqatigiit suli tapersersorini taamaattumillu Kattusseqatigiit sinnerlugit qinigassanngortittut marluinnanngortut tassalu Anthon Frederiksen-ip Niels Olsen-illu qinigassanngortinnerannut atatillugu atsiornernik katillugit 200-inik katersueqataanini unitsissanngikkini Soré Mølgaard oqarpoq.