Kattusseqatigiit partiiata ukiortaami oqaaseqaataa.
Ukioq qaangiuttoq politik-kikkut nuna tamakkerlugu ingerlatsiniaraluarnermi sutigut tamatigut ataqatigiisitsisoqannginnera, minnerunngitsumillu ilinniartitaanermut aammalu inuussutissarsiornermut Naalakkersuisut ataqatigiissaakkanik politik-keqannginnerisa, ilinniartitaanermut inuussutissarsiornermullu pilersaarutinik ersarissunik inuiaqatigiinni najoqqutarineqartussanik Nunatta amingaateqarnera, inuiaqatigiit pitsaasumik ingerlanissaannut assut kingaallassaataallunilu nukillaarsaataavoq.
Aamma inuussutissarsiutinut tunisassiornermullu Nunatta politik-kimik ersarissumik takussutissaqannginnerata kingunerivaa; aalisarnermik piniarnermillu inuussutissarsiuteqartut, tassungalu attuumassuteqartumik suliffissuarni sulisut siunissamut pilersaarusiornissaminnut nalorninartorsiortinneqarnerat.
Naalakkersuinikkut ataqatigiissaarinnginnerup aamma ersiutaanut ilaalluinnarput; naalakkersuisoqarfiit pisortaqarfiini ulluinnarni sulianut assigiinngitsunut tunngatillugu suliat ataqatigiisinniarneqarneri ajornartorsiutigineqarmata. Ilami allaat naalakkersuisut ataasiakkaat akornanni suliassat pisortaqarfimmiit pisortaqarfimmut ingerlateqattaarneqartarnerat sullitanut kinguarsaataaginnarani aamma inuiaqatigiit siuariartornissaannut kingaallassaataapput.
Pissutsit taamaannerat soorunami nuna tamakkerlugu ulluinnarni naalakkersuinermik ingerlataqartut, tassalu Naalakkersuisut, sulianut ersarissumik siunnerfeqartumik ataqatigiissaakkanillu politik-kikkut anguniagassanik peqannginnerisa tamanna ersiutingaat.
Aamma ukiuni kingullerni naalakkersuinikkut pissutsit toqqissisimanannginnerinut qulaani suliassat ilaannaasaluunniit naammassillugit suliarineqartussaangaluit, naalakkersuinikkut aqutsinerlunnerup kingunerisaanik naalakkersuisooqatigiit paarlakaannerujussuat, ilami allaat ikerinnakkut qinersisaqattaarnerit, naalakkersuisut ataasiakkaat namminneq piumassutsiminnik imaluunniit tunuartitaanermik kinguneqartumik pissuteqartumik naalakkersuinikkut suliniarsarineq kalaallit nunatsinnut inuinullu ajorluinnartutut nalilertariaqarpoq.
Tamakkua naatsumik oqaatigalugu naalakkersuinikkut siuttulunnermik pissuteqarput.
Taamaakkaluartoq aalisarnermik piniarnermillu inuutissarsiuteqartortavut, aamma namminersorlutik inuussutissarsiuteqartut assigiinngitsut, takornariartitsinermik suliaqartut, suliffissuarni sulisartut, allallu sulinermik inuutissarsiuteqartut, pisortani namminersortunilu sulisut, nersortarialimmik sapiissuseqarlutik saperuttaassusermillu peqarlutik nunatsinnik sullissilluarnerisa takutippaat aamma nunarput aningaasarsiornikkut imminut napatissinnaanissaminut pissutissaqarluartoq.
Taamaattumik qularutissaanngilaq; suli siuliani ujartorneqartutuut naalakkersuinikkut pilersaarusiorluakkanik ersarissunik pitsaanerungaartumillu ataqatigiissaarluakkanik inuiaqatigiit takussutissaqartinneqartuugunik, angusassaat pitsaanerungaassangaluarput.
Taamaammat ukiumut qaangiuttumut tamanut qujallunga, ukiumut nutaamut peqqinnermik iluanaarnissamillu tamassi kissaallusi Kattusseqatigiit partiiat sinnerlugu pilluaqquassi.
