Kattusseqatigiit atsiortitsinitik naammassivaat
Kattusseqatigiit partiinngoraluttuarput partiinngorunillu ateqalissaput Kattusseqatigiit partiiat.
Kattusseqatigiit kingullermik 2004-mi ataatsimeersuarnerminni aalajangerput inatsisartunut tullianik qinersisoqannginnerani partiinngorniarlutik. Partiinngornissamut atsiornerit naammattut Namminersornerullutik Oqartussanut tunniunneqareerput. Kattusseqatigiit siulittaasuata Anthon Frederiksen-ip partiinngortariaqarnertik ima tunngavilersorpaa.
- Kattusseqatigiit maannamut ukiuni 12-ini ingerlanerminni qinersisoqarnialernerit tamaasa atsiornerpassuarnik katersisariaqartarsimapput, tamanna piffissarujussuarmik nukippassuarnillu naleqartarsimavoq. Tamanna politikkikkut sulianiarnermut aamma kinguarsaataasarmat partiinngorniarluata atsiornernik katersisimavugut, maannalu atsiornerpassuit naammattut Namminersornerullutik Oqarussanut tunniutereerpagut.
Anthon Frederiksen oqarpoq Namminersornerullutik Oqartussat akissutissaat massakkut pissangallutik utaqqiinnaritsik.
- Akuerisaariarutta taava qineqqusaarutissagut inaassavagut qineqqusaarnissamullu piareersarneq nangillugu.
Anthon Frederiksen oqarpoq Namminersornerullutik Oqartussanit akissutissaq piariivinnissaminnut aalajangiisorujussuussasoq.
Partiitut pilersaarutit eqqarsaatigalugit, suliniutiminnillu naleqqussaanissamut inaarsivinnissamullu piffissaqarnissartik pingaaruteqarnerarpaa. Partiprogrammi piariilivinnerarpaa. Kikkut qassillu qinigassanngortissanerlugit maannakkut oqaaseqarfigisinnaanngikkallarnerarpaa, partiitut akuerisaanissaaq matumani aamma apeqqutaaqataammat.
Kattusseqatigiit partiinngussagunik atsiornerit 913-it katersortussaavaat, Anthon Frederiksen-ilu oqarpoq atsiornerit 1003-it pissarsiarisimagitik. Qinersinissaq manna sioqqullugu partiinngorniartunut killigitinneqarpoq tulliani marlunngorneq.
