Kattunnissamut piareersarput

Kalaallit Nunaat nutaaq pilersissallugu periarfissaqarpugut, siunissamut annertunerusunik takorluugaqarfiusumik. Aammalu nunatta inuisalu periarfissarisaannik pitsaanerungaartumik pikkoriffiunerusumillu atorluaasussanik.

Nuummi innuttaasunik Katuami pingasunngormat ataatsimiisitsinermi borgmester Agnethe Davidsenip ilaatigut taama oqarnera Nuup kommuneata nutaarsiassaqartitsiviata taama allaaseraa.

- Nuup Kommunea kisimiissinnaanngilaq, allat pisariaqartippavut, aammalu uagut pisariaqartippaatigut, Agnethe Davidsen oqarpoq.

Kommunit kattussuunnissaminnut piareersaleruttorput, taamatuttaaq Nuup Kommunea, nunatsinniinnaanngitsoq, aamma nunarsuatsinni, kommunenut annerpaanut ilaalersussaq, Ivittuut, Paamiut, Ammassalik Ittoqqortoormiullu kommunii kattuppata.

Kommunerujussuaq pilersinneqarpat tamakkerlugu 650.000 km2-isut atsigilissaaq, innuttaasullu 21.000-iulissallutik. Nuup Kommunea maanna 87.000 km2-uvoq, innuttaasullu 15.130-ullutik.

Kommunersuaq taanna qanoq ateqalerumaarnersoq nalugallarparput, massakkullu piareersarneq ingerlanneqaleruttormat kattuttussat suleqatigiinnerat atserneqarallarput ’Ikaartut’, qanga pinnguaaterput ’Pulaartut’ isumassarsiffigalugu, Nuuk Nyt taama allaaserinnippoq. Kattunnissaq maajip aallaqqaataani 2009-mi pisussatut ullulerneqarpoq.