Kattuffik: Nunatsinni inuit pisinnaatitaaffiinik sullissisoqartariaqarpoq
Inuit pisinnaatitaaffii pillugit tusarniaaneq ullumi Nuummi Katuami ingerlanneqarpoq.
- Danmarkimi inuit pisinnaatitaaffii pillugit suliffeqarfik kalaallinut sullissisinnaanngitsoq qanittukkut paasivarput. Tamanna kalaallinut atuutinnginnera ajortorujussuuvoq tupannarlunilu.
Tida Ravn taama oqarpoq.
Kalaallit Nunaanni inuit pisinnaatitaaffiinik sullissisussanik sulisoqalernissaa Tida Ravnip piumasaraa:
- Taamaattumik naalagaaffiup pisussaaffigisariarpaa kalaallinut inuit pisinnaatitaaffii pillugit saaffissamik pilersitsisoqarnissaa, Tida Ravn oqarpoq.
Tida Ravn isumaqarpoq nunatsinni inuit pisinnaatitaaffiinik unioqqutitsinerit arlaliusut.
- Avanersuarmiut pinngitsaalisaallutik nuutsitaanikuupput, inatsisitigut ataataqanngitsut immikkut pineqartutut misigisimapput, tamakkiisumik pisinnaatitaaffiit atorsinnaanagit isumaqarama. Saqqummertoqaqattaarpoq parnaarussat Danmarkimut nassiunneqartarnerannut tunngasumik. Tamakku pissutsit akuerineqarsinnaanngillat. Aamma meerarsianngortinneqarsimasuni paasivarput periaatsit suut atorneqarsimanersut Danmarkimullu nuussorneqarlutik. Pisariaqarpoq pissutsit taamaattut sammineqarnissaat, Tida Ravn oqarpoq.
Tida Ravn isumaqarpoq taakkartukkani susassaqartunut ingerlatinneqartariaqartut suliarineqartariaqartullu.
Tida Ravnip iluaraa inuit pisinnaatitaaffii pillugit tusarniaasoqartoq, tamannali siusinnerusukkut pisimasinnaagaluartoq oqaatigalugu.
- Soorunami oqartoqarsinnaavoq qangarsuarli tusarniaaneq ingerlanneqarsimasussaagaluartoq. Inuit pisinnaatitaaffii 1948-mili pilersinneqarput, kisianni ajunngilaq, kingusinaartinnata ullumi periarfissaritinneqartoq atorluaannassavarput, Tida Ravn oqarpoq.
Aappaagu maajip aappaani Danmarki inuit pisinnaatitaaffii pillugit FN-imi Geneve-mi misilitsittussaavoq, tamatumunngalu atatillugu inuit pisinnaatitaaffii pillugit inunnik tusarniaasoqarpoq.
