Kattuffiit tusarniaaffigaat

Naalakkersuisut iluarsaaqqinnissarsuartik pillugu aallarnisarlutik sulisartut sulisitsisullu peqatigiiffiinik ippassaq ataatsimeeqateqarput.

Naalakkersuisut siulittaasuata, Kuupik Kleistip, ukiortaami oqalugiarnermini ilimasaarutigaa, ukioq 2012 iluarsaaqqinnissarsuit ukiorissagaat. Tassalu ilaatigut soraarnerussutisiat, ineqarneq aammalu isumaginninneq pineqarput.

Aningaasaqarnermullu naalakkersuisoq, Maliina Abelsen, naapertorlugu, pingasoqiusaalluni isumaqatigiinniarnissaq asuliinnaq pinerussanngilaq, kisianni ilumut suleqatiginnikkusussusermut ersiutaassalluni.

- Imaanngilaq kusanarsaarniaannartugut. Tassaana iluarsaaqqinnissanut siunnersuutinik, suleqatigiilluta nassaarniarnissatsinnik ilumoorlutaa kissaateqartugut. Pissangalluta suliassaq aallartipparput, nukippassuillu atorumaarpagut, aningaasaqarnermut naalakkersuisoq oqarpoq.

Naalakkersuisut siusinnerusukkut nalunaareerput, akileraartarnermik aaqqissuusseqqinnermut, ineqarnermik iluarsaaqqinnermut isumaginnernnermillu iluarsaaqinnermut atatilugu inatsisissasut siunnersuutinik upernaakkut ataatsimiinnermi, apriilip 13-ani aallartittussami, saqqummiussisallutik.

Kisianni aningaasaqarnermut naalakkersuisoq maanna nalunaarpoq, inatsisissatut siunnersuutit upernaaru saqqummiuneqassanersut maanna nalornisigileritsik. Apeqqutaalluinnarpoq, pingasoqiusaalluni isumaqatigiinniarnerni sumut killikkumaarnissaaq.

Isumaqatigiinniarnissallu qanoq ingerlanneqarnissaannik, Naalakkersuisut qanoq pilersaaruteqarnersut, Maliina abelsenip maanna oqaatigiumanngilaa:

- Allaffitsinnut maanna uterluta qanoq suleriaaseqarnissatsinnik kattuffinnut siunnersuusiussaagut. Taava piffissap qanoq atornissaanut pilersaaruisiussaagut, misissussallugulu, iluarsaaqqinnissaat sorliit siulliullugit isuamqatigiinniutigissanerlugit, Maliina Abelsen abelsen oqarpoq.

Kisianni soorluuna Naalakkersuisut pingaarnersiuilereersimasut. Tassami akileraartarneq, allanngortingaatsiarneqartussaasoq, ilaatigut sulinermi aningaasarsianik akileraarutit appartinnerisigut siullerpaatut allassimavoq.

- Aap, akileraartarnerup iluarsartuuteqqinnissaa qitiuvoq, minnerunngitsumik amerlanerusut akileraartalernisaat aammalu naligiinnerusumik naapertiinerusumillu akileraartitsisalernissaq eqqarsaatigalugu, Maliina Abelsen oqarpoq.

Kattuffiit isumaqatigiinniarusussuseqarlutik takkussimammata, aningaasaqarnermut naalakkersuisup nersualaarpai.