Kattuffiit suleqatigiinnerunissaq pillugu isumasioqatigiipput

Kattuffiit 30 - 35-t siunissami suleqatigiinnerunissaq pillugu Nuummi Hotel Hans Egedemi decembarip aappaani pingajuanilu isumasioqatigeeqqammerput, kattuffiit siunissami aaqqissugaasinnaanerat pillugu aamma isumasioqatigiittoqarluni.
decembarip 04-at 2008 05:43

Atorfillit Kattuffianneersup, isumasioqatigiinnermillu aaqqissueqataasup, Erik Hammekenip, isumasioqatigiinnerup tunuliaqutaa ima nassuiaateqarfigaa:

Uani isumasioqatigiisitsinitsinni anguniarparput kattuffiit peqatigiiffiillu Namminersornerullutik Oqartussanut ullumikkut isumaqatigiinniartartut 30-t - 35 -t missaanni amerlassuseqarput, taakkulu akornanni uagut suleqatigiissutigisinnaasavut isumaqatigiinniussutigisinnaasatsinninngaaniit immaqa amerlanerpaarujorujussuupput. Taamaattumik pisariaqartissimavarput kattuffiit peqatigiiffiillu, Namminersornerullutik Oqartussanut namminneq isumaqatigiinniarsinnaatitaasut, immitsinnut tikilluta siunissami suleqatigiissutigisinnaasatsinnik oqallinnissarput, Erik Hammeken oqarpoq.

Isumasioqatigiinneq suli naammassineqanngitsoq Erik Hammeken ippassaq apersorneqarpoq, taamaammat sunik angusaqartoqarsimanersoq oqalutttuarisinnaasimanngilaa, kisianni ima oqarpoq:

- Kattuffiit siulittaasui, siulersuisunut ilaasortat, sulisut sinniisaat peqataarrattut amerlagatta immitsinnut oqaloqatigiilluartorujussuuvugut, taamaattumik siunissami suleqatigiinnerunissarput aamma isumalluarfigaarput, kattuffiit isumasioqatigiinneranni aaqqissueqataasoq Erik Hammeken oqarpoq.

Inuit kattuffinninngaanneersut, siulersuisuni ilaasortat sulisullu sinniisaat 50-it missaanniittut isumasioqatigiinnermi peqataapput.