Kattuffiit periaaseq nuannarinngilaat

Tatiginninneq innarlerneqartoq kattuffiit siulittaasui ataatsimut atsioqatigiillutik tusagassiuutinut nalunaaruteqarput. IMAK-ip siulittaasua Sivso Dorph ima oqarpoq.

- Sumiluunniit isumaqatigiinniaraanni, taava allassimanngitsunik malittarisassaqarpugut, tassa isumaqatigiinniarnerup nalaani imarisai pillugit avammut nalunaartoqarneq ajorluni. Taannalu ileqqoq tamanit atorneqartarpoq, tatigeqatigiinneq innarlerniarnagu.

Kattuffiit Namminersorlutik Oqartussanik tatiginninnerat ippassaq innarlerneqarpoq. Tassa Namminersorlutik Oqartussat isumaqatiginninniarnermut pisortaata utaqqiisaasumik inigisamut akiliutigineqartalersussatut kvadratmeterimut ataatsimut ukiumut 580 koruunit Kattuffinnut siunnersuutigalugu oktobarip 13-ianni ataatsimiinnermi saqqummiussimallugu radioaviisimut oqaaseqarmat.

- Taamatut saqqummiineq nalinginnaaasumik isumaqatigiinniarnermi tatigeqatigiinnermut innarliivoq.

Siunnersuutip isertuunneqarnissaa, sooruna uani pingaaruteqartoq?

- Uani isertuussisoqarnissaanik oqartoqanngilaq, kisianni isumaqatigiinniarnerup nalaani qanorpiaq inerniliisoqassanersoq utaqqimaarneqartariaqaraluarpoq, tamanut tusagassiaralugu oqaatiginnginnerani. Taannaana uagut kattuffinniit pigipput, Sivso Dorph oqarpoq.

Tatiginninnerup innarlerneqarnera pillugu tusagassiuutinut nalunaarut IMAK-ip siulittaasuanit atsioqataaffigineqartoq aamma Atorfillit Kattuffiata siulittaasuanit Erik Hammekenimit, ASG-ip siulittaasuanit Nikoline Zimmerimit, PK-p siulittaasuanit Karin Hollerimit kiisalu PIP-p siulittaasuanit Kaalina Skiftemit atsioqataaffigineqarpoq. Kattuffinniillu Namminersorlutik oqartussanik isumaqatigiinniarnissamut atatillugu tatigeqatigiinnerup aaqqinneqarnissaanut Naalakkersuinikkut qanoq iliuuseqartoqassanersoq maanna utaqqineqalerpoq.

Atorfimmut atatillugu inigisat, uanilu utaqqisaasumik inigisaqartarnermut akiliisarneq, isumaqatigiinniartartunut suliassaanngitsoq, Namminersorlutik oqartussat isumaqatigiinniarnermut pisortaata Palle Frederiksenip radioaviisimut oqaatigaa, erseqqissaallunilu kattuffinnut oktobarip 13-ianni ataatsimiinnermi tusarniaaffigineqartut.