Kattuffiit marluk: Utaqqiisaasumik inissiat ajorpallaaqaat

Kisianni illuanik isugutak, oquk aammalu inimut allamut nuutsinneqariataartarneq peqqutigalugit inigigallakkamut akiliuteqartarnissaq naapertuutinngitsoq, siulittaasut oqarput.

Sulisut utaqqiisaasumik ineqartinnerannut Namminersorlutik Oqartussat millionikkaanik aningaasartuuteqartarnerat tunngaviusumik naapertuuttumik isigineqarsinnaanngitsoq, sulisut kattuffiisa marluk maanna nassuerutigaat.

Kattuffiit marluk taakkua utaqqiissaasumik ineqarnermut tunngasunik Namminersorlutik Oqartussanut isumaqatigiinniartunut ilaapput.

- Naapertuutinngitsutut tunngaviusumik isigaara. Kisianni taamaattoqalersimaneranut Namminersorlutik Oqartussat namminneq pisuupput, Inatsisilerituut aningaasarsiornermillu ilinniagallit kattuffiata, DJØF-ip, Nunatsinni immikkoortuani siulittaasoq, Sebastian Bach Hansen, taama oqarpoq.

Ilinniagartuut kattuffiata allap ASG-p siulittaasua, Nikoline Ziemer, taamatorluinnaq aamma isumaqarpoq.

- Tunngaviusumik isigalugu ingasagineqarsinnaavoq. Kisianni aamma ilaasortatsinnut atugassaritinneqartut pissusissamisuunngillat, Nikoline Ziemer oqarpoq.

Taannami Sebastian Bach Hansenitulli isumaqarpoq, utaqqiisaasumik ineqartitsinermut millionikkaat ukiumut anigaasartuutigineqartarnerannut Namminersorlutik Oqartussat namminneerlutik pisuusut. Isumaqarpummi inissianut pitsaanngilluinnartunut akiliisarnissaq napertuutinngitsoq.

- Inissianut naaggaarsinnaanngisanut nuutsinneqaqattaarneq naapertuuppa? Inissiat oqaqarsinnaasarput, aamma pequttanik igaffimmilu atortunik amigaateqarsinnaasarput. Aamma kisimiittuugaluarluni inissiami tallimanik initalimmi ineqartitaaneq naapertuuppa? Uanga taama isumaqanngilanga. Arlaannik akiliuteqartalernissaq itigartivikkusunngilara, aammami kattuffiit arlaannaalluunniit taamaagunanngilaq, Sebastian Bach Hansen oqarpoq.

Nikoline Ziemer tamatumunnga isumaqataavoq, taassumalu utaqqiissaasumik ineqartitsisarnerup allaat atorunnaarsinneqarnissaa orniginartinnerugaluarpaa, ilaasortamili toqqissisimanartumik angerlarsimaffeqarnissaat minnerpaamik piumasaralugu.

- Utaqqiisaasumik ineqartitsinissaq pisariaqavippat, taakkua ajunngitsuusariaqarput namminerlu peqqusersorneqarsinnaasariaqarlutik. Namminermi angerlarsimaffigisamiiissinnaaneq qitiulluinnarpoq. Utaqqiisaasumik inissiani, allarpassuit atoreerinikuusaannik pequtalimmi, ineqartoqarusunngilaq, Nikoline Ziemer oqarpoq.

Ilaasortani utaqqiisaasumik ineqarnermut akiliisalissappata Sebastian Bach Hansen Namminersorlutik Oqartussanut assigiinngitsunik piumasarpoq.

- Nuutsitaaqattaassanngilagut. Kisimiittuugutta tallimanillu initalinnut nuutsinneqarutta, tamakkiisumik akiliisassanngilagut. Inissiaq oqoqarpat amigartunilluunniit pequtsersorneqarpat naaggaarsinnaassaagut, Sebastian Bach Hansen oqarpoq.