Kattuffiit isornartoqartitsipput

- Nuannaarutigeqaara, Naalakkersuisut siulittaasuata INI A/S-imi immikkut ittumik ataatsimeersuarnissamut qaaqqusiniartoq, INI A/S-ip inimut akiliutinik qaffaaniarnera unitsinniarlugu, Jess G. Berthelsen oqarpoq. Ajuusaarutigaa, Nukissiorfiup aktieselskabinngortinneqarnissaa suli pilersaarutigineqarmat.

- INI A/S-ip akinik qaffaaniarnerani maanaannaq qanoq iliorsinaannginneranut tunngaviuvoq, INI A/S aktieselskabiummat. Aamma Nukissiorfiit aktieselskabinngortinneqarpata akuliussinnaajunnaassaq, aningaasaqarnikkut pitsaanerpaamik ingerlanissaq pisussaaffinngussammat, SIK-miit Jess G. Berthelsen oqarpoq.

GA-p pisortaa, Henrik Leth, isumaqarpoq, Naalakkersuisut siulittaasuata oqalugiaataa aappaagu qinersisoqartussaaneranik sunnersimaneqartoq.

- Ininut akiliutit qaffanneqassanngitsut takuneqarsinnaavoq, aningaasanullu inatsisissami amigartoorujussuarnissaq illersorneqarpoq, Leth oqarpoq.

Taassuma oqalugiaat siuliinut naleqqiullugu nutaartalissuartut nalilinngilaa.

- Siunertarissaaruterpassuaqarpoq, tigussaasunilli siunnersuutikitsuararsuuvoq, GA-p pisortaa oqarpoq.

Henrik Leth-illi immikkoortoq CO2-mut Kyotomilu isumaaqatigiissummut tunngasoq isumaqatigaa.

- Oqarpoq, nunatsinni suliffiassuaqarnikkut ineriartornissamut periarfissaqartariaqartugut, naak Københavnimi aappaagu nutaamik isumaqatigiissusiortoqartussaagaluartoq, GA-p pisortaa Henrik Leth oqarpoq.