Kattuffiit aqunneqanngitsumik niisanniarusupput
Piniartut tapertaralugulu piniartut kattuffiisa Naalakkersuisut nunatta kitaani aappaagumit niisattassiisalerusunnerat akuersaanngilaat. Nuummi inuussutissarsiutigalugu piniartoq, Karl-Anders Skifte, aamma akerliuvoq.
- Niisanniarluta aallarutta tassa takujuaannartarpugut. Pisaqarnissatsinnut apeqqutaaginnartarpoq qanoq anorlertigalunilu imaritsiginera, 35-inik ukiulik Karl-Anders Skifte oqarpoq nangipporlu:
- Manna Nuup eqqaa, avataa, ukioq kaajallallugu niisaqartalernikuuvoq.
AAMMA ATUARUK Naalakkersuisut niisat piniagaanerat aqukkusuleraat
Aalisarnermut piniarnermullu naalakkersuisup, Aqqaluaq B. Egedep, niisaqartuaannarnissaa anguniarlugu nunatta kitaani aappaagumit killilersuilersaarluni KNR-mut siusinnerusukkut oqarpoq.
- Piujuartitsinissap nunarsuarmi annertusiartortumik suliarineqarnerata ilaatut niisa massakkut killiffigineqarpoq, Aalisarnermut piniarnermullu naalakkersuisoq, Aqqaluaq B. Egede oqarpoq.
Piniarnermut nalunaarsukkat naapertorlugit, kitaani Kommuneqarfik Sermersuumi siornaak 993-inik niisapput. NAMMCO-p ilisimatuussutsikkut ataatsimiititaliaata kommunimi tassani aappaagu pisassat amerlanerpaamik 490-nissaat innersuussutigaa.
Piniartoq: Pisassiisoqassappat nungujaassaqaat
Takkua ikippallaartut, piffissamilu sivikitsuinnarmi nungunneqassasut, piniartoq isumaqarpoq.
- Qaammatip ataatsip iluani nunguttussaapput 490-it. Taamaanngippat piniartut marluk pingasulluunniit kisimik ukiumut piniassavaat, Karl-Anders Skifte oqarpoq.
Taanna siorna 200-it missaannik niisalluni oqarpoq. Taanna aamma isumaqarpoq niisat ullumikkutut, tassa killilersugaanatik piniagaasariaqartut.
AAMMA ATUARUK Piniartoq: Niisat killilersorneqalernerat pitsaavoq
KNAPK-p niisanik killilersuerusunneq innersuussutiginagulu aamma akueriuminaatsippaa. Nunatta imartai piniartut takusartagaat naapertorlugit niisaqarnerulersimasut, kattuffik isumaqarpoq.
- Ukioq kaajallallugu nunatsinniittalernikuupput avannarpasinnerusumiilerlutillu. Silallu pissutaata allanngornerani takussaanerulernikuullutik, kattuffik tusarniaanermi akissumminni ilaatigut taama allappoq.
Tapertaralugu Piniartartut Aalisartartullu Kattuffiat, Naalakkersuisut tusarniaanerannut aamma akissuteqarput. Taakkua aappaagumit niisattassiisalerusunneq akerleralugu, ullumikkutullu killeqanngitsumik piniaannarusullugit ilaatigut allapput.
