Kattuffiit aalisartut appisaluuppaat

Aalisarneq pillugu inatsisissap akuersissutigineqarnissaa pinngitsoortinniarlugu aammalu aalisarnermut naalakkersuisoq tunuaqqullugu, KNAPK-p Nuummi immikoortoqarfia umiarsualivinnik assersueqqusilluni kaammatuivoq.

SIK-p siulittaasuata Jess G. Berthelsenip aamma GA-p pisortaata, Henrik Lethip, tikkuarpaat, aalisartut Nunatsinni tassaasut ukiumi kingullermi isertitamikkut siuariarnerpaat.

- Aalisakkeriviutaatillit angisuut marluk kisitsisaataasa takutippaat, qaammatini aqqaneq marlunni kingullerni tunisinerit ataatsimut katikkaanni, isertitat siorna piffissamut tassunga naleqqiullugit 150 millionit koruuningajannik amerlanerusut. Tassalu 33 procentimik qaffariarneruvoq, Jess G. Berthelsen aamam Henrik Leth ataatsimoorussamik allapput.

- Piffissami,  nunatta aningaasarsiornikkut ilungersornartorsiorneranik
tamatta nassuertariaqarfitsini, inuiaqatigiinni ilaasut allanit ajornerusumik eqqugaanngitsut namminissarsiorlutik nammaqatigiinnermillu anersaaqaratik piumasaqarnissaat piffissaanngilaq. Aalisartut ingammik SIK-p isumaqatigiissutaa malillugit aningaasarsialippassuarnit ajornerusumik atugaqanngillat.

- Aalisartut ajornartorsiutaat iluarsiniaraanni, umiarsualivinnik assersuineq pissusissaanngilaq, tamattali nalunngilarput, iluarsaaqqinnissat pisariaqartut, taakkualu oqaloqatigiissutigisariaqarpagut suleqatigiissutigalugillu,Jess G. Berthelsen aamma Henrik Leth tikkuaapput.

Nuummi Aalisartut Piniartullu Peqatigiiffiat ippassaq kaammattuipput, nuna tamakkerlugu umiarsualivinnik assersuisoqassasoq, aalisarneq pillugu inatsit oqallissutaaqisoq sapaatit akunneranni tullermi akuersissutigineqassasoq naatsorsuutigineqarmat.

Nuuk TV naapertorlugu KNAPK-p siulittaasua, Leif Fontain, kattufiup siulersuisui sapaatiuppat ataatsimeereertinagit, pisunut oqaaseqarumanngilaq.