Katsorsartittussat pillugit ilungersorput
Sapaatip-akunnera kingulleq radioaviisimi Qanoruumilu soorlu sammineqareersutut meeraq napparsimaviliartinneqartussaq 15-leereersimatillugu Namminersornerullutik Oqartussat malittarisassaat naapertorlugit angajoqqaajusut qitornaminnut angallassisuunissaminnut akiliunneqarsinnaanngillat.
Ilanngutasseereernerup kingorna angajoqqaat arlallit taamatut maanna misigisaqartut radioaviisimut saaffiginnipput.
Nanortalimmi najugalik Agnes Thor 16-ileeqqammersumik erneqarpoq, ernera upernaaq imminoriarnermi kinguneranik qarnga innarlersimaqimmat Danmarkimi Rigshospitalimi qanermigut qilaalersittussaavoq. Qanittukkullu paasitinneqarput nukappiaraq kisimiilluni aallartussanngortoq. Nukappiaraq danskisut paasisinnissinnaanera oqalussinnaaneralu killeqaqaaq taamaammallu kisimiissappat arnaata assut isumaalugaa.
- Kisimiittussanngortoq SANA-mit kalerrinneqarpunga. Tamanna inuttaanut apuuppara, kisimiittussanngorninilu paasigamiuk narrujuummisorujussuuvoq, Agnes Thor oqarpoq.
Taanna erngerluni allagaqaraluarpoq ulloq mannali tikillugu suli akissutisinngilaq.
- Angalanissamut akissaqannginnama imaaliallaannaq ilagisinnaanngilara. Assut ilungersunarpoq, Agnes Thor oqarpoq.
Martha Lyberth Lynge Maniitsumi najugalik 16-nik ukiulimmik paneqarpoq, pania pukutsumi saarngata patiatigut meeraaraallunili tinupasoqarpoq, tinupasorlu taanna sianiutaanut attuumangajammat nukillaarnermik kinguneqartitsisinnaavoq. 16-inik ukiulik jannuaarimi kisimiitillugu Danmarkiliartussanngortinneqarpoq, kalerrinneqarmallu angajoqqaavi kalerrinnagit inuttaa kisiat kalerrinneqarsimavoq.
- Tamanna akuersaarneqarsinnaanngilaq. Inersimasutut suli piginnaaneqanngilaq, 18-ileereersimasunut tamanna tulluarneruvoq, Martha Lyberth Lynge oqarpoq.
Peqqissutsimut naalakkersuisoq Arkalo Abelsen sapaatip-akunnera kingulleq neriorsuivoq malittarisassaq tamanna nalilersorneqaqqissasoq.