Katsorsartittartut inuusutsikkaluttuinnarput
Ukiuni kingullerni qulini katsorsartittartut inuusussiartortut, Katsorsaavik Nuummi katsorsaasoq Grethe Kramer Berthelsen oqarpoq.
- Inuusuttut akornanni imigassartorneq mutiusutut atugaasoq peqqutaaqataavoq. Tusartarpagut, ilaat arfinillit-arfineq-marluk missaannik ukioqarlutik misileeqqaartartut, oqarpoq.
Katsorsaasup maluginiarpaa pingaartumik arnat ikiortinniarlutik saaffiginnittut amerliartortut.
- Ukiut kingulliit malunnarsinikuuvoq amerliartornerat. Katsorsartittut inuussussiartorput. Tassaanerupput ikiortinniarlutik tunuarsimaanngitsut. Qangamut naleqqiullugu ajornartorsiutiminnik iliuuseqarfiginninnissamut kajuminnerulersimasuupput, Grethe Kramer Berthelsen oqarpoq.
Inuusuttut aamma angajoqqaamissut sivisuumik ajornartorsiuteqarniaratik periarfissanik takunnilersimanerarpai.
- Iluatsinnerusimanersulli oqarsinnaanngilara. Iliuuseqarnissaminnilli imminnut periarfississimaniaraangamik inuusuttorpassuit atuiunnaartarput tamaaalillutik atukkatik pitsaanerusunngortikkiartortarlugit. Meeqqamik aamma atugaat pitsanngortikkiartortittarlugit.
Grethe Kramer Berthelsen Katsorsaavik Nuuk ApS-imi piginneqataasoq taama oqarpoq.
Nunatsinni qaqiffinniit oqaaseqartitsiniaraluaratta iluatsitsinngilagut. Taamaattumik nunatsinni katsorsartittartut agguaqatigiissillugu qassinik ukioqarnerat paasisinnaasimanatigu.