Katsorsartissimasunut kommune akiliisitsisinnaanngilaq

Kommunit arlallit pisumut periaaserisartagaat misissuiffigereerlugit, Ombudsmandi taama aalajangiussivoq. Matumani arlalinnik assersuutissaqarpoq, tassa innuttaasut atornerluisuusut ukioq ataaseq suli qaangiutinngitsoq, katsorsartissimasut naapittarfiannut AA-mut takkutinngikkaangata, imertaleqqillutillu taava akiligassinneqartarput.

Tamannali pissusissamisuunngitsoq ombudsmandip oqaatigaa. Katsorsartittunut kommunip aningaasaliinissaanik immikkut ittunik malittarisassaqanngilaq. Ombudsmandilli oqaatigaa, innuttaasut katsorsartinnerinut kommunip aningaasartuutai, pisortat ikiorsiisarnerinut atatillugu isigineqassasut. Pisortallu ikiorsiisarnerinut malittarisassat siornatigut ullumikkulluunniit atuuttut naapertorlugit kommunit akiliutigereriikkaminnik utertitsinnissamik piumasaqarnissamut periarfissaqanngillat.