Katsorsartikkiartortut 18-iliineqanngitsut ingiaqataat akiliunneqartalissapput
15-iniit 18-inut ukiullit illoqarfimmut nunamulluulliit allamut napparsimmaviliassappata ingiaqataasussaq aamma akiliunneqassaaq.
-15-iniit 18-inut ukiullit aamma meeraapput, siunnersuummik saqqummiussisoq, Demokraatineersoq, Astrid Fleischer Rex, oqarpoq:
- Peqqinnissaqarfimminngaanniit 15-inik ukioqaleraangata inersimasutut, imaluunniit nammineq pisinnaasutut isigineqalertaramik. Taamaammat 15, 16, 17, 18-inillu ukiullit napparsimaleraangamik nunaqarfitsik illoqarfitsilluunniit qimattussanngorlugu, ilagitinneqarneq ajorput ilaquttaminik imaluunniit angajoqqaaminik. Taamaammat siunnersuisimavunga 18-iliinissamik tungaannut illoqarfitsik qimallugu aallassagunik angajoqqaaminnik arlaannilluunniit qanitaminnik ingiaqateqartassasut. Ippassaq naalakkersuisut siulittaasuata akigaminga oqarpoq, bilitsit immaqa 1,7 milliuuninik akeqarsinnaasut. Kisiannili uanga bilitsiinnaq pinngilara aamma angerlarsimaffimmi akiligassat aallaraanni; meeqqat allat paarineqarnissaat, atassuteqaatit, kallerup innera, illup akilernissaa, sorpassuit aamma nanertuutaasarput, ingiaqateqaraanni napparsimasuummik. Tamakkua aamma kiseqqissaarneqarnissaat ukiamut kissaatigaakka. Imaanngilaq ukioq manna napparsimaveqarfimminngaanniit tiguneqassasut, napparsimasunummi allanut tussanngillat, immikkulli aningaasaliiffigineqassallutik. Taamaalereerpallu aperisinnaaavugut sumiimmi taakku tiguneqassappat. Soorlu meeqqat checkiat ukiumut 18-20 milliuuninik naleqartarpoq, imaluunniit rejeafgiftimik peqalersinnaavugut ukiumut 100 milliuunikkaat tassuuna tigusinnaallugit, Astrid Fleischer Rex oqarpoq.
17-inik ukiullip, Rita Christensenip, angajoqqaavi siunnersuutip suliarineqarnerani Demokraatit attavigisarsimavaat. Rita-p qitini qaammatit marluk matuma siorna napivaa. Danmarkimi maanna sungiusaqqittussanngorpoq, 15-illi sinnerlugit ukioqarmat angajoqqaavi ingiaqataanissaminnut akiliunneqarsinnaanngillat.
-Siuariarnerujuvoq, Inatsisartut anguniagaat aamma ajunngillat. Isumaqarpungali ingiaqateqarnissap 18-inik ukiulinnut killilerneqarnera suli appasippallaartoq. 20-nik, 22-nik 23-nilluunniit ukioqaraluaraanni apeqqutaanngilaq. Taama annertutigisumik ajoqusertoqartillugu qassinik ukioqarneq apeqqutaanngilaq. Minutsialunnguimmi ingerlanerinnaanni inuuneq allanngorujussuarsinnaavoq, tamannalu ilaqutariinnut ilungersunartaqaaq akisoqalunilu, Rita Christensenip angutaa, Poul Erik Christensen, oqarpoq.
…
Naggasiut:
Astrid Fleischer Rexip siunnersuutaa Inatsisartut ukiaru ataatsimiilerpata aappassaaneerneqassaaq. Tassani aamma aalajangerneqassaaq aningaasanik qanoq amerlatigisisunik tapiisoqartassanersoq.
