Katsorsarneqarsinnaanngitsut Danmarkimi periarfissinneqaqquai
38-nik ukiulik Svend Fly Uummannameersoq aqajaqqumi paavatigut kræfteqartoq radioaviisimi tusarliupparput. Svend Fly Danmarkimut nuunngikkuni misiligutaasumik kræftimut katsorsarneqarsinnaanngilaq.
Danskit kræftemik nappaateqartut katsorsarneqarsinnaajunnaaraangata, misiligutaasunik katsorsarnissaannik neqeroorfigineqartarput, periarfissatut kingullertut.
Tamanna 10 15 millioner koruuninik danskit naalagaaffiata karsianut aningaasartuutaasarluni. Atassut apeqquteqaateqarnera malillugu misiligutaasumik katsorsartinneq kræfteqartunut iluaqutaasarpoq.
Kalaallit kræftimik nappaateqartut Danmarkimi misiligutaasumik katsorsartissinnaanerat pillugu Atassut siorna inatsississatut siunnersuummik saqqummiussivoq, tamannali akuerineqarani.
Agathe Fontain peqqissutsimut naalakkersuisuunerata nalaani siunnersuut saqqummiunneqarmat, taanna oqarpoq, milisigutaasumik kræftemut katsorsartinneq ukiumut 4 5 millioner koruuninik akeqartoq.
