Katsorsaaviup pilersinnissaa isumaqatigiissutigineqarpoq
Naak katsorsaavimmik pilersitsinissamik pisariaqartitsineq isumaqatigiissutaagaluartoq, katsorsaaviup qanoq atorneqarnissaa aamma katsorsarneqarnissamik neqeroorut kikkunnut sammitinneqassanersoq - tassa meeqqanut inersimasunulluunniit - imaluunniit taakkununnga tamanut neqeroorutaassanersoq, isumaqatigiinngissutaavoq.
Oqallisigineqartut ilagaat qitiusumi katsorsaaveqassanersoq, katsorsaasartunik angalasunik tapertaqartinneqartumik, imaluunniit Nunatsinni kommunini sisamaasuni tamani katsorsaavinnik pilersitsisoqassanersoq. Aamma katsorsaavinni imaluunniit katsorsaavimmi sulisussanik naleqquttunik qanoq pissarsiniartoqartassanersoq.
Tamakkua aalajangersimasumik ullumikkut akineqanngillat. Siunnersuut aappassaanneerneqartinnagu Inatsisartut ataatsimiititaliaannut pingasunut, tassa isumaginninnermut, peqqinnissamut, aningaasaqarnermullu ataatsimiititalianut ingerlateqqinneqarpoq. Suliniummut aningaasaliissutissat siulliit Isumaginninnermut naalakkersuisup Maliina Abelsenip, 2010-mi meeqqanut ilaqutariinnullu ataqatigiissaakkamik suliniutitut atorneqartussanit 25 millionit koruunit neriorsuutigai.
Politiit kisitsisaataasa ersersippaat, 1995-imiit 2008-mut 5.350-it kinguaassiuutitigut inniminniilliorfigineqarsimasut. MIPI-p misissuineranit paasineqarpoq, Nunatsinni anaanaasut tamarmiusut 30 procentii, inuunermik ilaanni kinguaassiuutitigut kannguttaatsuliorfigineqarsimasut.
