Katsorsaavimmik pilersitsinissaq Tasiortap anguniarniarpaa

Katsorsaavimmik, ilinniarsimasunik tamakkiisumik sulisulimmik pilersitsinissaq, kinguaassiuutitigut innarliisarneq akiorniarlugu tapersersuilluni peqatigiiffiup, Tasiortap, kissaataasa annersaraat.
maajip 01-at 2009 07:09

Tasiortami siulersuisut inissititeqqammerput, siulittaasunngoqqilluni Arnaq Grønvold, siulittaasunullu tullinngorpoq Aili Liimakka Laue.

Sinerissami immikkoortortaqarfeqalernissaq Tasiortap aamma pilersaarutigaa.

- Kisianni sulerusussuseqaannarniarutta politikkikkut tapersersorneqarnissarput - minnerunngitsumillu aningaasaliiffigineqarnissarput - atorfissaqartipparput, Arnaq Grønvold oqarpoq.

Kinguaassiuutitigut atornerluineq tusagassiuutini sammineqaraangat politikerit ikittuinnaat akuliuttarnerat Arnaq Grønvoldip tikkuarpaa.

- Politikerit isummersortartullu allat saqqumilaartut tamaasa atorfissaqartippavut. Ajortut uteqqianerat unitsittariaqarparput, taamaammat aningaasanik immikkoortitsisariaqarpusi, Tasiorta tusagassiutinut allappoq.